सामना देवकोटा
अस्टिन, टेक्सास
नेपाली समुदायको बाक्लो बसोबास रहेको अमेरिकाको टेक्सास राज्यको राजधानी अस्टिनमा यस वर्षको बडा दशैं–तिहार तथा तिहारको अवसरमा तीनदिने दशैं–तिहार मेला आयोजना हुने भएको छ। इजी पिपल सप्लायर्स एलएलसी अस्टिनको आयोजनामा हुने मेला अक्टोबर १७ देखि १९ सम्म सञ्चालन हुनेछ।
बडादशैं तथा दीपावली नेपाली समुदायका प्रमुख चाडपर्व हुन्। विदेशमा रहेर पनि नेपाली संस्कृति, परम्परा र चाडपर्वको उल्लासलाई निरन्तरता दिने तथा मातृभूमिको अनुभूति गराउने उद्देश्यले मेला आयोजना गर्न लागिएको आयोजक कम्पनीका सञ्चालक कुशल नहर्कीले जानकारी दिए।
नेपाली समुदायका सदस्यले सञ्चालन गरिरहेका स्थानीय व्यवसायको प्रवर्द्धन गर्नुका साथै व्यवसायीबीच सहकार्य र आपसी सम्बन्ध विस्तार गर्नु पनि मेलाको उद्देश्य रहेको नहर्कीले बताए।
मेलामा खानपान, लत्ताकपडा, गरगहना, हस्तकलाका सामग्री तथा चाडपर्वमा आवश्यक पर्ने विभिन्न वस्तुका स्टल रहनेछन्। मेलाका तीनै दिन अपराह्न ४ बजेदेखि मध्यरातसम्म आगन्तुकले किनमेल, मनोरञ्जन तथा सामाजिक भेटघाटको अवसर पाउनेछन्।
मेलालाई थप आकर्षक बनाउन तीनै दिन डिजे संगीतको व्यवस्था गरिनेछ। साथै, विभिन्न चर्चित कलाकारले सांगीतिक तथा मनोरञ्जनात्मक प्रस्तुति दिने कार्यक्रमसमेत रहेको आयोजकले जनाएको छ।
नहर्कीका अनुसार मेलाको अर्को उद्देश्य नाफा कमाउनु मात्र नभई स्थानीय व्यवसायीलाई एउटै मञ्चमा जोड्नु र उनीहरूका उत्पादन तथा सेवाको प्रचारप्रसारमा सहयोग पुर्याउनु हो। साना व्यवसायी, घरेलु उत्पादनकर्ता तथा घरबाटै सामान बिक्री गरेर व्यवसाय सञ्चालन गरिरहेका उद्यमीलाई समेत आफ्नो व्यवसाय विस्तार गर्ने अवसर प्रदान गरिने उनले बताए।
तीन दिनका लागि स्टल शुल्क २०० डलर
आयोजकका अनुसार मेलामा स्टल राख्न तीन दिनका लागि २०० अमेरिकी डलर शुल्क निर्धारण गरिएको छ। उक्त शुल्कमा टेन्ट, टेबल र कुर्सीको व्यवस्था समावेश हुनेछ।
मेलामा जम्मा २० वटा स्टल रहने भएकाले सहभागी हुन इच्छुक व्यवसायीलाई समयमै बुकिङ गर्न आयोजकले आग्रह गरेका छन्। मेलाले व्यवसायीलाई आफ्ना उत्पादन तथा सेवा प्रदर्शन गर्न, नयाँ ग्राहकसम्म पुग्न र व्यवसाय विस्तार गर्न सहयोग पुर्याउने अपेक्षा गरिएको छ।
खानपानदेखि परम्परागत पहिरनसम्मका सामग्री
मेलामा साडी, कुर्ता तथा अन्य परम्परागत पोसाक, गरगहना, उपहार सामग्री, घर सजावटका वस्तु, पूजा सामग्री, सौन्दर्य सामग्री, मेहन्दी, अल्टर तथा थ्रेडिङ सेवा र घरायसी उपयोगका सामान उपलब्ध हुनेछन्। विभिन्न नेपाली तथा अन्य खानाका परिकारले पनि आगन्तुकलाई आकर्षित गर्ने अपेक्षा गरिएको छ।
यसका अतिरिक्त घर खरिद, ऋण तथा करसम्बन्धी परामर्श सेवा पनि उपलब्ध हुने आयोजकले जनाएको छ। मेलामा मनपसन्द सुपरमार्केट, साइलीको बुटिक, अल्टर एन्ड थ्रेडिङ, गोर्खा बर्गर, आपका बजार सुपरमार्केट, निम्तो किचन, लाली सन र डग च्युलगायतका व्यवसायी सहभागी हुने जनाइएको छ।
दसैँ–तिहारको उल्लास साटासाट गर्ने, नेपाली संस्कृति र परम्परासँग जोडिने तथा स्थानीय व्यवसायलाई प्रोत्साहन गर्ने अवसरका रूपमा मेलालाई लिइएको छ। अस्टिन, फ्लुगरभिल तथा आसपासका क्षेत्रमा बसोबास गर्ने नेपाली समुदायलाई परिवार र साथीभाइसँग मेलामा सहभागी हुन आयोजकले निमन्त्रणा दिएका छन्।