नेपाली खबरीलाल
ड्यालस, टेक्सस
टेक्ससमा रहेका नेपाली समुदायबीच आपसी सद्भाव, भाइचारा र एकता अभिवृद्धि गर्ने उद्देश्यले नेपाली समाज टेक्सस (एनएसटी) र लुम्बिनी सेवा समाज अमेरिकाबीच मैत्रीपूर्ण भलिबल प्रतियोगिता आयोजना हुने भएको छ ।
लुम्बिनी सेवा समाज अमेरिकाले हरेक वर्ष आयोजना गर्दै आएको उक्त प्रतियोगिता यस वर्ष अक्टोबर ३१, शनिबार हुने भएको हो । समाजले सार्वजनिक गरेको जानकारीअनुसार विगतमा विभिन्न सामाजिक संस्थाबीच मैत्रीपूर्ण भलिबल प्रतियोगिता आयोजना हुँदै आएकोमा यस वर्ष भने एनएसटी र लुम्बिनी सेवा समाज अमेरिकाबीच मात्र प्रतिस्पर्धा हुनेछ।
लुम्बिनी सेवा समाज अमेरिकाका सचिव दीपक भण्डारीका अनुसार टेक्ससमा रहेका नेपाली समुदायबीच आपसी सद्भाव, भाइचारा र एकता अभिवृद्धि गर्ने उद्देश्यले प्रतियोगिता आयोजना गर्न लागिएको हो। प्रतियोगितामा दुवै संस्थाका कार्यसमिति पदाधिकारी तथा सदस्यहरूको सहभागिता रहनेछ ।
विजया दशमी तथा शुभ दीपावलीको अवसर पारेर आयोजना गर्न लागिएको प्रतियोगिताले चाडपर्वको शुभकामना आदानप्रदान गर्नुका साथै नेपाली समुदायका विभिन्न संघसंस्थाबीच आपसी सम्बन्ध सुदृढ बनाउन सहयोग पुग्ने आयोजकको अपेक्षा छ ।
विगत तीन वर्षदेखि निरन्तर आयोजना हुँदै आएको यो प्रतियोगिता यस वर्ष चौथो संस्करणका रूपमा सञ्चालन हुन लागेको हो । कार्यक्रमको संयोजन हेमराज भट्टराईले गर्नेछन् ।
आयोजकले टेक्ससमा रहेका नेपाली समुदायका सदस्यहरूलाई प्रतियोगितामा सहभागी भई खेलाडीको हौसला बढाउन तथा विजया दशमी र दीपावलीको खुसी एकआपसमा साटासाट गर्न आग्रह गरेको छ।
