नेपाली खबरीलाल
ड्यालस, टेक्सस —
टेक्ससको ह्युस्टनमा क्रियाशील नेपाली युवाहरूको संस्था चन्द्र–सूर्य फुटबल क्लब ले नयाँ वर्षको अवसरमा नयाँ वर्ष कप फुटबल प्रतियोगिता आयोजना गर्ने भएको छ।
नेपाली समुदायका स्थानीय युवाहरूलाई खेलकुदतर्फ आकर्षित गर्नुका साथै खेलकुदको माध्यमबाट खेलाडीहरूबीच आपसी सद्भाव र समुदायिक एकता सुदृढ बनाउने उद्देश्यले प्रतियोगिता आयोजना गर्न लागिएको क्लबले जनाएको छ।
आयोजकका अनुसार प्रतियोगिता आगामी जनवरी १० र ११, २०२६ मा ह्युस्टनस्थित Cullen Park Field #7 मा सञ्चालन हुनेछ। प्रतियोगितामा हालसम्म १० वटा फुटबल टिम ले दर्ता गराइसकेका छन्।
नयाँ वर्ष कप फुटबल प्रतियोगितामा पहिलो हुने टिमलाई ट्रफीसहित २,६०० अमेरिकी डलर, दोस्रो हुने टिमलाई ट्रफीसहित १,००० अमेरिकी डलर प्रदान गरिनेछ।
यसका साथै MVP (उत्कृष्ट खेलाडी), सर्वाधिक गोलकर्ता तथा उत्कृष्ट गोलकिपर लाई ट्रफीसहित ५०–५० अमेरिकी डलर पुरस्कार प्रदान गरिने आयोजकले जनाएको छ।
प्रतियोगितामा वितरण गरिने पुरस्कार राशि हालसम्म आयोजना भएका यस्तै प्रकारका प्रतियोगितामध्ये सबैभन्दा ठूलो रहेको आयोजकको दाबी छ।
सन् २०१३ देखि खेलकुद क्षेत्रमा सक्रिय चन्द्र–सूर्य फुटबल क्लबले आयोजना गर्न लागेको यस प्रतियोगितालाई ह्युस्टनस्थित नेपाली समुदायका विभिन्न व्यवसायी तथा संघ–संस्थाहरूले सहयोग गरिरहेको क्लबले जानकारी दिएको छ।