नेपाली खबरीलाल
ड्यालस, टेक्सस
टेक्ससको ड्यालस–फोर्टवर्थ क्षेत्रका समाजसेवी स्वर्गीय हरिबोल भण्डारीको प्रथम स्मृति दिवसका अवसरमा आयोजित रक्तदान कार्यक्रममा ६५ पिन्ट रगत संकलन गरिएको छ ।
स्वर्गीय भण्डारीका परिवारले आयोजना गरेको उक्त रक्तदान कार्यक्रममा कुल ७१ जनाले रक्तदानका लागि नाम दर्ता गराएका थिए। तीमध्ये ६५ जना रक्तदानका लागि योग्य ठहरिएका थिए । रक्तदान गर्ने ६५ जनामध्ये ३७ जना पहिलोपटक रक्तदान गर्ने रक्तदाता रहेको कार्यक्रम संयोजक गुप्तराज जोशीले जानकारी दिए ।
नेपाली सांस्कृतिक तथा आध्यात्मिक केन्द्र, युलेश, टेक्ससको परिसरमा आयोजना गरिएको उक्त रक्तदान कार्यक्रमका लागि ब्लड डोनर्स एसोसिएसन अफ अमेरिका (बीडीए) टेक्सस, नेपाली जनसम्पर्क समिति डिएफडब्ल्यु तथा पश्चिम च्याप्टरले सहयोग गरेका थिए भने कार्टर ब्लडकेयरले प्राविधिक सहयोग उपलब्ध गराएको थियो ।
स्वर्गीय हरिबोल भण्डारी नेपाली समुदायमा सामाजिक सेवा तथा विभिन्न सामुदायिक गतिविधिमा सक्रिय व्यक्तिका रूपमा परिचित थिए । उहाँ नेपाली जनसम्पर्क समिति अमेरिकासँग आबद्ध रहेका थिए ।
