नेपाली खबरीलाल
ड्यालस, टेक्सस
अमेरिकामा रहेका नेपाली समुदायद्वारा स्थापित सामाजिक संस्था ब्लड डोनर्स अफ अमेरिका (बिडिए) को दोस्रो वार्षिक साधारण सभा आगामी मे २५, २०२६ मा कोलोराडोमा आयोजना हुने भएको छ ।
बिडिएका अनुसार साधारण सभा कोलोराडोस्थित नेपाली घरको सभाकक्षमा आयोजना गरिनेछ । कार्यक्रममा संस्थाका केन्द्रीय कार्यसमिति, सल्लाहकार, आजीवन सदस्यहरू तथा अमेरिकाका विभिन्न राज्यमा रहेका दुई दर्जनभन्दा बढी च्याप्टरका प्रतिनिधिहरूको सहभागिता रहने जनाइएको छ ।
साधारण सभाले संस्थाको वार्षिक प्रगति प्रतिवेदन तथा आर्थिक प्रतिवेदन पारित गर्नुका साथै आगामी वर्षका कार्यक्रम तथा योजनाहरू अनुमोदन गर्नेछ । साथै संस्थाले सञ्चालन गर्दै आएका रक्तदान तथा सामाजिक सेवासम्बन्धी अभियानका विषयमा समेत विस्तृत छलफल गरिने बताइएको छ ।
यसैबीच बिडिएको वार्षिक साधारण सभाको अवसर पारेर बिडिए कोलोराडो च्याप्टर र International Nepali Literary Society (अन्तर्राष्ट्रिय नेपाली साहित्य समाज) कोलोराडो च्याप्टरको संयुक्त आयोजनामा मे २४, २०२६ मा विशेष रक्तदान कार्यक्रम आयोजना गरिने भएको छ ।
आयोजकका अनुसार “रक्तदान गरौं, जीवन बचाऔं” भन्ने मूल नारासहित सञ्चालन हुने उक्त कार्यक्रममा नेपाली समुदायको उल्लेखनीय सहभागिता रहने अपेक्षा गरिएको छ । बिडिएले सामाजिक उत्तरदायित्व तथा मानवीय सेवाको भावनालाई अझ सशक्त बनाउने उद्देश्यसहित कार्यक्रम आयोजना गर्न लागिएको जनाएको छ ।