नेपाली खबरीलाल
ड्यालस, टेक्सस
नेपाल सरकारले टेक्ससको ड्यालसमा स्थापना गर्न लागेको महावाणिज्य दूतावास कार्यालय सञ्चालनका लागि आवश्यक प्रक्रिया औपचारिक रूपमा सुरु भएको छ। उक्त कार्यालयका लागि नियुक्त भई आउनु भएका सहसचिव तथा महावाणिज्यदूत श्री सुरेश अधिकारीले कार्यालय स्थापनाको प्रक्रिया अघि बढेको जानकारी दिनुभएको हो।
नेपाली समाज टेक्ससद्वारा मंगलबार ड्यालसमा आयोजित स्वागत तथा सम्मान कार्यक्रममा बोल्दै महावाणिज्यदूत अधिकारीले दूतावास कार्यालय स्थापनाका लागि स्थानको छनोट कार्य भइरहेको र अमेरिकी सरकारबाट स्वीकृति प्राप्त भएपछि छिट्टै सेवा सञ्चालनमा आउने जानकारी दिनुभयो।
ड्यालसमा स्थापना हुन लागेको महावाणिज्य दूतावास कार्यालयले टेक्सससहित ओकलाहामा, अर्कान्सास, लुजियाना, न्यू मेक्सिको, क्यान्सस, मिसिसिपी र कोलोराडो राज्यका नेपाली समुदायलाई सेवा प्रदान गर्ने जनाइएको छ। परराष्ट्र मन्त्रालयद्वारा उक्त कार्यालयका लागि चार जना कर्मचारी पदस्थापन गरिएका छन्, जसमा सहसचिव तथा महावाणिज्यदूत सुरेश अधिकारी र उपसचिव श्रीमती धना जोशी हाल ड्यालसमा रही नेपाली समुदायका अगुवासँग छलफल र समन्वय गरिरहनु भएको छ।
सोही कार्यक्रममा नेपाली समुदायका अगुवाहरूले नेपाल सरकारले स्थापना गर्न लागेको महावाणिज्य दूतावास कार्यालयलाई नेपाली समुदायकै कार्यालयका रूपमा लिँदै पूर्ण समर्थन र सहयोग रहने प्रतिबद्धता व्यक्त गरेका थिए।
नेपाली समाज टेक्ससका महासचिव विजय भुसालको सञ्चालनमा सम्पन्न कार्यक्रममा संस्थाका अध्यक्ष राजेन्द्र वाग्लेले ड्यालसमा महावाणिज्य दूतावास स्थापना कार्यमा सहयोग पुर्याउने सबैलाई धन्यवाद ज्ञापन गर्नुभयो।
उक्त अवसरमा युलेस सिटीका उप–प्रमुख टिका पौडेल, नेपाली सांस्कृतिक तथा आध्यात्मिक केन्द्रकी अध्यक्ष सिता सापकोटा, नेपाली समाज टेक्ससका पूर्वअध्यक्ष प्रेम अधिकारी, गैरआवासीय नेपाली संघ (अमेरिका) का वरिष्ठ उपाध्यक्ष विकास उप्रेती, पानस अमेरिकाका अध्यक्ष रवि रावल, प्रवासी नेपाली मञ्च अमेरिकाका सचिव विजय भट्टराई, ग्रेटर अस्टिन नेपाली समाजका कोषाध्यक्ष धिरेन्द्र यादव, नेपाली जनसम्पर्क समिति ड्यालसका अध्यक्ष ज्ञानेन्द्र कार्की, जनप्रगतिशील मञ्च अमेरिकाका ओम लामिछाने तथा नेपाल अमेरिका पत्रकार संघ (नेजा) का अध्यक्ष सुरज भण्डारीले मन्तव्य व्यक्त गर्नुभएको थियो।
