नेपाली खबरीलाल
न्यूयोर्क, अमेरिका
अमेरिकाको न्यूयोर्कमा रहेका नेपाली समुदायले आइतबार ‘नेपाल उत्सव’ (नेपाल डे परेड) मनाएका छन्। नेपालको पर्यटन प्रवद्र्धनमा सहयोग पु–याउने उद्देश्यले आयोजना गरिएको नेपाल उत्सवमा नेपाली समुदायको उत्साहजनक सहभागिता रहेको थियो।
नेपाल उत्सव कार्यक्रममा न्यूयोर्कका अतिरिक्त न्यूजर्सी र कनेक्टिकट राज्यबाट पनि नेपाली पोसाक, राष्ट्रिय झन्डा र ब्यानरसहित नेपालीहरू सहभागी भएका थिए।
नेपाल उत्सव कार्यक्रमको उद्घघाटन गर्न आएका न्यूयोर्क सहरका मेयर एरिक एडम्स र सिनेटर चक सुमरले नेपाली कला र संस्कृतिको खुलेरै प्रशंसा गरेका थिए। नेपाली समुदायले हरेक वर्ष आयोजना गर्ने नेपाल उत्सव कार्यक्रममा प्रस्तुत गरिने कला र संस्कृतिले न्यूयोर्कलाई थप विविधतायुक्त सहर बनाउनमा सहयोग पुगेको धारणा व्यक्त गरे।
न्यूयोर्कको व्यस्त क्षेत्र म्यानहाटनमा पञ्चेबाजासँगै, भजन, देउडा तथा हुड्केली, सोरठी, मैथिली, शेर्पा र तामाङ सेलो लगायतका कला र संस्कृति प्रदर्शन गरिएको थियो। नेपाल डे परेड कार्यक्रममा प्रस्तुत गरिएका विभिन्न कार्यक्रम र संस्कृतिहरूलाई स्थानीय अमेरिकी समुदायले पनि रुचिपूर्वक अवलोकन गरेका थिए।
हरेक वर्ष गणतन्त्र दिवसको अवसर पारेर न्यूयोर्कमा आयोजना गरिने नेपाल डे परेड कार्यक्रमले नेपाललाई विश्व सामु चिनाउनुका साथै विदेशी समुदायको ध्यान आकर्षण गराउने गरेको नेपाल सरकारका पर्यटन प्रवद्र्धक गोकुल श्रेष्ठले दाबी गर्नु भयो।
गैरआवासीय नेपाली संघ, अमेरिका न्यूयोर्क च्याप्टरको आयोजना तथा नेपाली समुदायका एक दर्जनभन्दा बढी संस्थाको सहभागितामा नेपाल डे परेड कार्यक्रम आयोजना गरिएको थियो। एनआरएनए न्यूयोर्क च्याप्टरका अध्यक्ष छिरिङ शेर्पाको अध्यक्षतामा सम्पन्न परेडमा मनिता गुरुङले संयोजकको भूमिका निर्वाह गरेकी थिइन्।
सन् २०१६ देखि सुरु गरिएको नेपाल डे परेड कार्यक्रम नेपाली समुदायमा राष्ट्रिय पर्वकै रूपमा स्थापित भइसकेको नेपाली समुदायका अगुवाहरू बताउँछन्।