नेपाली खबरिलाल
ड्यालस टेक्सस
यस बर्षको महाशिबरात्री पर्ब मनाउन अमेरिकाको टेक्ससमा भब्य तयारी गरिएको छ । टेक्ससका बिभिन्न स्थानमा रहेका नेपाली मन्दिर(पशुपतिनाथ मन्दिर) हरुमा महाशिबरात्री पर्बको रौनक शुरु भएको छ । महाशिबरात्री पर्बको अवसरमा यहाँका नेपाली मन्दिरहरु सरसफाइदेखि फूल तथा विभिन्न रङले सिङ्गारेर झकिझकाउ बनाईएको छ ।
टेक्सासको ड्यालस फोर्टवर्थ क्षेत्रको युलेशमा रहेको पशुपतिनाथ मन्दिर तथा बौद्ध बिहारमा आईतबार देखि महाशिबरात्री महोत्सब शुरु भएको छ । नेपाली साँस्कृतिक तथा अध्यात्मिक केन्द्रकी अध्यक्ष सीता सापकोटाका अनुसार महाशिबरात्री महोत्सब आईतबार शुरु भइृ बुधवार समापन हुने छ । महोत्सबका क्रममा ग्लोबल नेपाली पाठशालाका बिद्यार्थीहरुले समेत भजन किर्तन प्रस्तुत गरिरहेको मन्दिरले जनाएको छ । महोत्सबका क्रममा दैनिक बेलुकी पूजाआजा, भजन किर्तन, महाआरती तथा धार्मिक अनुष्ठानका कार्यक्रम भईरहेका छन ।पशुपतिनाथ मन्दिरमा महाशिबरात्री महोत्सब तथा फ्रेबुअरी २६ का दिन हुने महाशिबरात्री मेलामा सबै नेपालीहरुलाई सहज रुपमा दर्शन तथा पूजाआजा गर्ने व्यवस्था मिलाईएको मन्दिरले जनाएको छ ।
शिबरात्री पर्बलाई प्रवासमा उत्सबको रुपमा मनाउँदा नेपाली सँस्कृति, चाडपर्बको प्रबद्र्धन हुनुका साथै पुस्तान्तरण गर्न सहयोग पुग्ने केन्द्रकी अध्यक्ष सीता सापकोटाले बताउनु भयो ।
यसैगरि टेक्ससको राजधानी अस्टिनमा बसोवास गर्ने नेपाली समुदायले यस बर्षको महाशिबरात्री पर्बलाई “महाशिवरात्रि तथा हट्टो सिटि ‘टेम्पल डे” का रुपमा मनाउने भएका छन । ग्रेटर अस्टिन नेपाली सोसाइटी अस्टिनको आयोजनामा स्थानीय पशुपतिनाथ मन्दिरमा फ्रेबुअरी २६ बुधबारका दिन भव्य पूजाआजा, महाआरती, तथा धार्मिक अनुष्ठानहरूको आयोजना हुने समाजका उपाध्यक्ष अशोक शाहीले बताउनु भयो । समाजका उपाध्यक्ष शाहीका अनुसार अस्टिन स्थित हट्टो सिटी काउन्सिलले गत वर्षदेखि महाशिवरात्री पर्बलाई “टेम्पल डे” को रूपमा आधिकारिक रूपमा घोषणा गरेकाले पनि नेपाली समुदायले महाशिबरात्री पर्बलाई बिशेष उत्सबका रुपमा मनाउन लागेको हो ।
अस्टिन स्थित नेपाली पशुपतिनाथ मन्दिरमा सोमबार देखि बुधबार सम्म हरेक दिन शिवलिंग अभिषेक, दुग्धाभिषेक, फल तथा गंगाजल अर्पण, र वैदिक मन्त्रोच्चारण सहितको विशेष पूजा हुनेछन । भक्तजनहरूलाई हरेक दिन बिहानदेखि रातिसम्म दर्शन, पूजा, तथा विभिन्न धार्मिक अनुष्ठानहरूमा सहज रुपमा सहभागी हुन सक्ने गरि व्यवस्था मिलाईएको छ ।
ग्रेटर अस्टिन नेपाली समाज (ग्यान्स) ले महाशिवरात्री धार्मिक उत्सबमा भक्तजनहरूको सुविधाका लागि Adam Orgain Park 1001 Co Rd 137, Hutto, TX 78634 बाट प्रत्येक १० मिनेटमा निःशुल्क शटल बस सेवाको समेत व्यवस्था गरिएको जनाएको छ ।
यस्तै टेक्ससको ह्युस्टन स्थित पशुपतिनाथ मन्दिरमा पनि महाशिबरात्री पर्ब मनाउन भब्य तयारी गरिएको छ । महाशिबरात्री पर्बको अबसरमा बुधबार फ्रेबुअरी २६ का दिन बिशेष पूजाआजा, महा प्रसाद, भजनकिर्तन लगायतका धार्मिक कार्यक्रम आयोजना गरिने नेपाली समाज ह्युस्टनका सल्लाहकार द्रोण गौतमले बताउनु भयो ।
टेक्ससका बिभिन्न स्थानमा रहेका अन्य नेपाली मन्दिरहरुमा पनि महाशिबरात्री पर्ब उल्लासपूर्बक मनाउन तयारी गरिएको बुझिएको छ ।
