नेपाली खबरीलाल
अस्टिन, टेक्सस
गैरआवासीय नेपाली संघ (एनआरएनए) राष्ट्रिय समन्वय परिषद् (एनसीसी) अमेरिकाको नाममा विगत एक वर्षदेखि समानान्तर रूपमा सक्रिय रहेका दुई समूहबीचको विवाद अन्त्य भएको छ। लामो समयदेखि जारी मतभेदलाई टुंग्याउँदै दुवै पक्षले औपचारिक रूपमा एकता घोषणा गरेका छन्।
शनिबार अस्टिन, टेक्ससमा सुरु भएको एनआरएनए एनसीसी अमेरिकाको १५औँ वार्षिक साधारणसभा तथा एकता अधिवेशनको उद्घाटन समारोहमा दुवै पक्षले संयुक्त रूपमा एकताको घोषणा गरेका हुन्।
राउन्ड रकस्थित होलिडे इन होटलमा आयोजित उद्घाटन समारोहमा दुवै एनसीसीका अध्यक्ष सतेन्द्र साह र विकास उप्रेतीले संयुक्त रूपमा पानसमा दीप प्रज्वलन गर्दै अधिवेशनको उद्घाटन गरेका थिए। सो अवसरमा उनीहरूले अबदेखि एउटै एनसीसीमार्फत अमेरिकामा रहेका गैरआवासीय नेपालीहरूको साझा प्रतिनिधित्व गरिने प्रतिबद्धता व्यक्त गरे।
उद्घाटन समारोहलाई सम्बोधन गर्दै अध्यक्ष विकास उप्रेतीले गैरआवासीय नेपालीहरूको आवाजलाई अझ सशक्त बनाउन र संस्थागत एकतालाई मजबुत बनाउन दुवै पक्षबीच सहमति भएको बताए। उनले लामो समयसम्म चलेको संवाद र छलफलपछि १६ बुँदे सहमतिमा हस्ताक्षर भएको जानकारी दिँदै त्यसको अक्षरशः कार्यान्वयन गर्ने प्रतिबद्धता जनाए।
“हामीले लामो संवादपछि १६ बुँदे सहमति गरेका छौं। त्यसको अक्षरशः पालना गर्दै एकतालाई सफल बनाउने हाम्रो साझा प्रतिबद्धता छ,” अध्यक्ष उप्रेतीले भने।
अर्का अध्यक्ष सतेन्द्र साहले आम गैरआवासीय नेपालीहरूको एउटै एनसीसी हुनुपर्ने चाहनालाई सम्मान गर्दै एकताको निर्णय गरिएको बताए। उनले सहमतिपत्रमा हस्ताक्षर भइसकेको उल्लेख गर्दै केही वैधानिक प्रक्रिया मात्र बाँकी रहेको जानकारी दिए।
“हामीबीच सहमति र एकता भइसकेको छ। अब बाँकी रहेका केही वैधानिक प्रक्रिया साधारणसभाको बन्दसत्रबाट पूरा गर्दै एकतालाई पूर्णता दिनेछौं,” अध्यक्ष साहले भने।
उद्घाटन समारोहमा बोल्ने अधिकांश वक्ताहरूले विगत एक वर्षदेखि विभाजित रहेको एनआरएनए एनसीसी अमेरिका पुनः एकीकृत हुनु ऐतिहासिक र सकारात्मक उपलब्धि भएको बताए। उनीहरूले एकताले नेपाली डायस्पोराको आवाजलाई अझ प्रभावकारी र सशक्त बनाउने उल्लेख गर्दै व्यक्तिगत स्वार्थभन्दा संस्थागत हितलाई प्राथमिकता दिनुपर्नेमा जोड दिए।
कार्यक्रमका प्रमुख अतिथि डा. अर्जुन बन्जाडे, विशिष्ट अतिथि तथा पूर्व अध्यक्ष सुनिल साह, अन्तर्राष्ट्रिय समन्वय परिषद् (आईसीसी)का उपाध्यक्ष रविन्द्र बज्राचार्य, पूर्ण बनियाँलगायतका वक्ताहरूले एकता अधिवेशन सफल हुने विश्वास व्यक्त गर्दै नयाँ यात्राका लागि शुभकामना दिएका थिए।
यसअघि बिहान ८ बजेदेखि ११ बजेसम्म जुममार्फत सम्पन्न वार्षिक साधारणसभाले एकताका लागि भएको १६ बुँदे सहमतिलाई सर्वसम्मत रूपमा अनुमोदन गरेको थियो। भर्चुअल साधारणसभामा आईसीसी अध्यक्ष हेमराज शर्मा, महासचिव तथा दुवै एनसीसीका पदाधिकारी र सदस्यहरूको उल्लेखनीय सहभागिता रहेको थियो।
विगत केही महिनादेखि एनआरएनए अमेरिकाका दुई पक्षले एउटै मितिमा ड्यालस र अस्टिनमा छुट्टाछुट्टै १५औँ वार्षिक साधारणसभा आयोजना गर्ने घोषणा गरेका थिए। त्यसपछि अन्तर्राष्ट्रिय समन्वय परिषद् (आईसीसी)ले हस्तक्षेप गर्दै एकीकृत साधारणसभालाई मात्र आधिकारिक मान्यता दिइने स्पष्ट पार्दै छुट्टाछुट्टै साधारणसभा नगर्न दुवै पक्षलाई कडा निर्देशन दिएको थियो।
आईसीसीको पहलपछि दुवै पक्षबीच चरणबद्ध रूपमा संवाद र वार्ता सुरु भएको थियो। अन्ततः लामो छलफलपछि १६ बुँदे सहमतिमा पुग्दै दुवै पक्षले संगठनात्मक एकताको घोषणा गरेका हुन्। सहभागीहरूले यस एकतालाई अमेरिकास्थित नेपाली समुदायका लागि नयाँ सुरुआतका रूपमा लिँदै अब एउटै संस्थामार्फत समुदायका साझा हित, अधिकार र पहिचानका मुद्दालाई थप प्रभावकारी रूपमा अघि बढाउने विश्वास व्यक्त गरेका छन्।
दुबै एनसिसिका बिचमा भएका सहमती यस्तो छ ।
