नेपाली खबरीलाल
ड्यालस, टेक्सस
नेपाली महावाणिज्यदूतावास, ड्यालसले नेपाल सरकारको राहदानी विभागद्वारा लागू गरिएको नयाँ विद्युतीय राहदानी प्रणालीमार्फत राहदानी सेवा सुरु गरेको छ। उपमहावाणिज्यदूत धना जोशीका अनुसार महावाणिज्यदूतावासले जुलाई १५, २०२६ देखि नयाँ प्रणालीमार्फत राहदानी सेवा प्रदान गर्न थालेको हो।
उपमहावाणिज्यदूत जोशीका अनुसार नयाँ प्रणाली लागू भएसँगै सेवा सञ्चालनमा आए पनि प्रारम्भिक तीन महिनासम्म ‘प्रणाली स्थिरीकरण अवधि’ (Stabilization Period) रहने भएकाले यस अवधिमा केही प्राविधिक चुनौती देखिन सक्ने सम्भावना रहेको छ।
महावाणिज्यदूतावासले सामाजिक सञ्जालमार्फत जारी गरेको सूचनामा यस अवधिमा अत्यावश्यक अवस्थामा रहेका सेवाग्राहीलाई मात्र राहदानी आवेदन दिन अनुरोध गरेको छ। विशेषगरी राहदानीको म्याद सकिएको, राहदानी हराएको, केही समयभित्र म्याद समाप्त हुने अवस्थामा पुगेको वा अन्य कुनै अत्यावश्यक कारणले नयाँ राहदानी आवश्यक परेकाले मात्र आवेदन दिन अनुरोध गरिएको छ।
राहदानी बनाउन चाहने सेवाग्राहीले अनलाइन आवेदन फाराम भरेर प्रक्रिया सुरु गर्नुपर्ने व्यवस्था गरिएको छ। आवेदन प्रक्रिया, आवश्यक कागजात तथा अन्य विस्तृत जानकारी महावाणिज्यदूतावासको आधिकारिक वेबसाइटमा उपलब्ध रहेको जनाइएको छ।
महावाणिज्यदूतावासले नयाँ प्रणाली पूर्ण रूपमा स्थिर हुन केही समय लाग्ने भएकाले सेवाग्राहीलाई धैर्य र सहयोग गर्न आग्रह गरेको छ। सेवा प्रवाहलाई थप सहज, छिटो र प्रभावकारी बनाउन आवश्यक समन्वय तथा प्राविधिक सुधारका कार्यहरू निरन्तर भइरहेको पनि सूचनामा उल्लेख गरिएको छ।
राहदानी सेवासम्बन्धी थप जानकारी आवश्यक परेमा सेवाग्राहीले नेपाली महावाणिज्यदूतावास, ड्यालसको आधिकारिक वेबसाइट, इमेल वा टेलिफोनमार्फत सम्पर्क गर्न सक्ने जनाइएको छ।
