नेपाली खबरीलाल
ड्यालस, टेक्सस
टेक्सस नेपाली मेडिकल एसोसिएसन (टीएनएमए) द्वारा सञ्चालित हिमालय हेल्थ क्लिनिकको सेवा विस्तार तथा पूर्वाधार विकासका लागि “फन्ड रेजिङ गाला डिनर” आयोजना हुने भएको छ।
क्लिनिकको नियमित सेवा सञ्चालन र दीर्घकालीन विकासका लागि आगामी मे १६, शनिबार ग्रेपभाइनस्थित एम्बेसी स्वीट्समा गाला डिनर आयोजना गर्न लागिएको हो । उक्त कार्यक्रम साँझ ५ः३० बजेदेखि राति ११ बजेसम्म सञ्चालन हुनेछ । कार्यक्रममा नेपाली कलाकारहरूको सांगीतिक प्रस्तुति समेत रहनेछ ।
क्लिनिकका कार्यकारी कार्यालय निर्देशक राज श्रेष्ठका अनुसार “फन्ड रेजिङ गाला डिनर” मा सहभागी हुन टिकट खरिद गर्नुपर्नेछ । कार्यक्रममा संकलित रकम खर्च कटाएर बाँकी बचत रकम क्लिनिकको सेवा विस्तार तथा पूर्वाधार विकासका लागि प्रयोग गरिने उनले जानकारी दिए ।
समुदायको निरन्तर सहयोगका कारण हालसम्म क्लिनिकको सेवा सञ्चालन सम्भव भएको उल्लेख गर्दै श्रेष्ठले स्वास्थ्य सेवा विस्तार तथा स्तरोन्नतिका लागि आर्थिक स्रोत जुटाउन गाला डिनर आयोजना गरिएको बताए ।
“सामुदायिक स्वास्थ्यका लागि हातेमालो” भन्ने नारासहित टेक्ससमा रहेका नेपाली स्वास्थ्यकर्मीहरूको सक्रियतामा टेक्सस नेपाली मेडिकल एसोसिएसन (टीएनएमए) स्थापना गरिएको हो । उक्त संस्थाले सन् २०२० मा हिमालय हेल्थ क्लिनिक स्थापना गरेको भए पनि कोभिड महामारीका कारण सन् २०२३ मे महिनादेखि नियमित रूपमा सञ्चालन हुँदै आएको छ ।
हरेक महिनाको पहिलो र तेस्रो आइतबार बिहान १० बजेदेखि दिउँसो १ बजेसम्म युलेसस्थित नेपाली सांस्कृतिक तथा आध्यात्मिक केन्द्र परिसरमा क्लिनिक सञ्चालन हुँदै आएको टीएनएमएले जनाएको छ ।
हाल क्लिनिकमा चिकित्सक, दन्त चिकित्सक तथा नर्ससहित करिब २०० बढी स्वयंसेवक सक्रिय छन् । क्लिनिकमार्फत मेडिकल, दन्त तथा प्रयोगशाला सेवा तथा स्वास्थ्य परामर्श सेवा उपलब्ध गराइँदै आएको छ । टेक्ससको ड्यालस–फोर्ट वर्थ क्षेत्रमा नेपाली समुदायको बाक्लो बसोबास रहेको र नेपालबाट आउने आफन्तहरूको संख्या बढेसँगै क्लिनिकमा बिरामीको चाप पनि वृद्धि हुँदै गएको बताइएको छ।
क्लिनिक पूर्ण रूपमा निःशुल्क रूपमा सञ्चालन भएपनि मासिक कम्तीमा १० हजार अमेरिकी डलर खर्च हुने गरेको छ । चिकित्सक तथा नर्सहरूले स्वयंसेवी रूपमा सेवा प्रदान गरे पनि प्रत्येक क्लिनिक सञ्चालनमा करिब ५ हजार डलर खर्च हुने गरेको जनाइएको छ ।
अमेरिकी मापदण्डअनुसारका औषधि, स्वास्थ्य सामग्री तथा भण्डारण व्यवस्थापनमा ठूलो खर्च हुने भएकाले सेवा निरन्तरता र विस्तारका लागि अतिरिक्त आर्थिक स्रोत आवश्यक रहेको पनि उल्लेख गरिएको छ।
टीएनएमए स्थापना तथा हिमालय हेल्थ क्लिनिक सञ्चालनमा नेपाली समाज टेक्ससले सहयोग र सहजीकरण गरेको थियो । हिमालय हेल्थ क्लिनिकबाट स्वास्थ्य बिमा नभएका तथा आफन्त भेट्न अमेरिका आएका नेपाली आमाबुबा प्रत्यक्ष रूपमा लाभान्वित भएकाले सबै नेपाली समुदायले गाला डिनर कार्यक्रम तथा क्लिनिकलाई सक्दो सहयोग गर्न नेपाली समाज टेक्ससका अध्यक्ष विजय भुसालले आग्रह गरेका छन्।
