नेपाली खबरीलाल
वासिङ्टन डिसी (अमेरिका)
यस बर्षको विश्व प्रेस स्वतन्त्रता दिवसको अवसरमा आईतबार अमेरिकाको वासिङ्टन डिसीस्थित नेपाली दूतावासको सभाकक्षमा सम्पन्न अन्तरक्रिया कार्यक्रममा सहभागी भएका नेपाली पत्रकार तथा समुदायका अगुवाहरूले लोकतन्त्र, सुशासन र समृद्धिका लागि प्रेस स्वतन्त्रता अपरिहार्य रहेको बताएका छन् ।
अमेरिकास्थित नेपाली राजदूतावास र नेपाल अमेरिका पत्रकार संघ (नेजा) द्वारा आइतबार आयोजित कार्यक्रममा वक्ताहरूले संविधान प्रदत्त प्रेस तथा अभिव्यक्ति स्वतन्त्रताले नै लोकतन्त्रलाई बलियो बनाउने भएकाले कुनै पनि बहानामा यसमाथि बन्देज लगाउन नहुनेमा जोड दिएका थिए ।
कार्यक्रममा सहभागीहरूले नेपालमा पछिल्लो समय प्रेस तथा अभिव्यक्ति स्वतन्त्रताको अवस्था सन्तोषजनक नरहेको उल्लेख गर्दै लोकतन्त्र र प्रेस स्वतन्त्रताको पक्षमा बोल्ने तथा लेख्ने पत्रकारहरूलाई सामाजिक सञ्जालमार्फत आक्रमण तथा मानसिक यातना दिने क्रम बढ्दै गएकोप्रति चिन्ता व्यक्त गर े।
सो अवसरमा अमेरिकी मिडियाका जानकार प्रा. डा. च्याड स्टिभेन तथा नेपाली मिडियाका विश्लेषक एवं नेजाका पूर्व कार्यवाहक अध्यक्ष कृष्णप्रसाद शर्माले दुवै देशमा प्रेस स्वतन्त्रताको पछिल्लो अवस्थाबारे प्रस्तुति दिएका थिए ।
अमेरिकाको मिजौरी विश्वविद्यालयका प्राध्यापक प्रा. डा. स्टिभेनले ट्रम्प प्रशासनपछि अमेरिकामा प्रेस स्वतन्त्रताको अवस्था अपेक्षाकृत सन्तोषजनक नरहेको धारणा व्यक्त गरे ।
त्यसैगरी, कृष्णप्रसाद शर्माले नेपालमा सामाजिक सञ्जालको दुरुपयोग, फेक न्यूजको प्रभाव तथा मिडियाप्रति सरकारको अनुदारता प्रेस स्वतन्त्रताका प्रमुख चुनौतीका रूपमा रहेको बताए ।
कार्यक्रममा अमेरिकाका लागि कार्यवाहक नेपाली राजदूत शरदराज आरनले दूतावासले गरिरहेका गतिविधिबारे जानकारी गराउँदै नेपालको समृद्धि र विकासमा जिम्मेवार प्रेसको भूमिका महत्वपूर्ण रहेको बताए ।
उनले नेपालमा नयाँ सरकारसँगै सुशासन, आर्थिक सुधार, पूर्वाधार विकास र समावेशीतातर्फ प्रयास भइरहेको उल्लेख गर्दै यी लक्ष्य हासिल गर्न नागरिक, संस्था तथा विश्वभर रहेका नेपाली समुदायको सक्रिय सहभागिता आवश्यक रहेको बताए ।
राजदूत आरनले स्वतन्त्र र जिम्मेवार प्रेस लोकतन्त्रको जीवनरेखा भएको उल्लेख गर्दै यसले नागरिकलाई सूचित गर्ने, संस्थाहरूलाई उत्तरदायी बनाउने तथा पारदर्शिता प्रवद्र्धन गर्ने धारणा व्यक्त गरे ।
यस्तै, नेजाका संस्थापक अध्यक्ष गिरिश पोखरेलले नेपालमा प्रेस स्वतन्त्रताको अवस्था सन्तोषजनक नरहेकाले प्रेस तथा अभिव्यक्ति स्वतन्त्रता कुण्ठित गर्ने कुनै पनि प्रयासविरुद्ध सबै एकजुट हुनुपर्ने बताए ।
नेपाली दूतावासका काउन्सेलर अरुणा घिसिङको सञ्चालनमा सम्पन्न कार्यक्रममा बोल्दै नेजाका अध्यक्ष सुरज भण्डारीले प्रेस तथा अभिव्यक्ति स्वतन्त्रता केवल पत्रकारहरूको मात्र अधिकार नभई लोकतन्त्रको आधार स्तम्भ भएको उल्लेख गर्दै यसको संरक्षण अपरिहार्य रहेको बताए ।
कार्यक्रममा अमेरिकाका विभिन्न राज्यबाट सहभागी करिब पाँच दर्जन नेपाली पत्रकार, दूतावासका कर्मचारी तथा नेपाली समुदायका अगुवाहरूको उल्लेखनीय उपस्थिति रहेको थियो ।
