नेपाली खबरीलाल
फोर्टवर्थ, टेक्सस
पछिल्लो समय नेपाली समुदायको बाक्लो बसोवास रहेको टेक्ससको फोर्टवर्थमा होली पर्वको रौनक सुरु भएको छ । यहाँका नेपाली समुदायले यही फेब्रुअरी २८ शनिबारका दिन रमाइलो होली कार्यक्रम आयोजना गर्ने तयारी थालेका छन् ।
यस वर्षको होली पर्व फागुन १८ र १९ गते (मार्च २ र ३, २०२६) परेको छ । तर अमेरिकामा सबैलाई पायक पर्ने मिति र बिदाको दिन पारेर चाडपर्व मनाउने परम्परा रहेकाले फेब्रुअरी २८ शनिबारका दिन होली मनाउन लागिएको नेपाली दिवाज फाउन्डेशनले जनाएको छ । उक्त कार्यक्रम फोर्टवर्थ नेपाली समाजसँगको सहकार्यमा आयोजना गरिएको फाउन्डेशनकी अध्यक्ष बिनिमा सुबेदीले जानकारी दिनुभयो ।
कार्यक्रम West Fork Ranch Park, 2350 Angoni Way, Fort Worth, Texas 76131 मा दिउँसो १२ः३० बजेदेखि साँझ ५ः०० बजेसम्म सञ्चालन हुनेछ । कार्यक्रममा प्रवेश निःशुल्क रहने आयोजकले बताएका छन् ।
यसैबीच टेक्ससको ड्यालस–फोर्टवर्थ क्षेत्रमा रहेका विभिन्न जातीय तथा क्षेत्रीय नेपाली संस्थाहरूले सामूहिक तथा छुट्टाछुट्टै रूपमा होली पर्व मनाउने तयारी गर्दै सामाजिक सञ्जालमार्फत कार्यक्रमका ब्यानर सार्वजनिक गरिरहेका छन् ।
फोर्टवर्थ क्षेत्रमा बसोवास गर्ने नेपाली समुदायलाई समय र दूरीका आधारमा पायक पर्ने गरी कार्यक्रम आयोजना गरिएको अध्यक्ष सुबेदीले बताउनुभयो ।
रङहरूको पर्वका रूपमा परिचित होली नेपालीहरूले परापूर्वकालदेखि हर्षोल्लासका साथ मनाउँदै आएका छन् । विदेशमा रहेका नेपाली समुदायले पनि आफ्ना मौलिक चाडपर्वलाई निरन्तरता दिँदै आएका छन् । विशेषगरी अमेरिकामा जन्मेका र हुर्केका दोस्रो पुस्तालाई नेपाली संस्कृति र परम्पराबारे जानकारी गराउने उद्देश्यले विगतका वर्षदेखि सामूहिक रूपमा होली आयोजना गर्दै आएको फाउन्डेशनले जनाएको छ ।
आयोजकका अनुसार रमाइलो होली कार्यक्रममा पर्वको सांस्कृतिक महत्व उजागर गर्दै होलीको शुभकामना आदानप्रदान, नाचगान, मिलन तथा सद्भावको सन्देश फैलाउने उद्देश्य राखिएको छ । बालबालिकालाई फागुपूर्णिमाको महत्वबारे जानकारी गराउँदै समुदायबीच आपसी एकता र भाइचाराको भावना अझ मजबुत बनाउने लक्ष्य लिइएको छ ।
आयोजकले सम्पूर्ण नेपाली समुदायलाई उपस्थित भई रंगीन तथा उल्लासमय होली उत्सव मनाउन आग्रह गरेका छन् ।
होली फोटो ः गुगल
