नेपाली खबरीलाल
ड्यालस, टेक्सस
नेपाल अमेरिका पत्रकार संघ (नेजा) की क्षेत्रीय संयोजक हरिमाया काफ्ले (सिर्जना) अमेरिकाको मेरिल्याण्ड राज्यस्थित बाल्टिमोर काउन्टीको “कमिसन फर वुमन” को बोर्ड सदस्यमा नियुक्त भएकी छन्।
नेपालमै रहँदा देखि महिला अधिकार, समानता र सशक्तीकरणका क्षेत्रमा सक्रिय पत्रकार काफ्लेको अनुभव, योगदान र नेतृत्व क्षमतालाई मूल्यांकन गर्दै उक्त जिम्मेवारी प्रदान गरिएको हो।
बाल्टिमोर काउन्टी एक्जुकेटिभ क्याथी क्लाउज्मायरले काफ्लेलाई महिला आयोगको बोर्ड सदस्यमा नियुक्त गरिएको जानकारी दिँदै आयोगमा उनको सहभागिताप्रति खुशी व्यक्त गरेकी छन्। काफ्लेको कार्यकाल जनवरी २३ देखि लागू भई डिसेम्बर ३१, २०२८ सम्म रहने जनाइएको छ।
नेजा क्षेत्रीय संयोजक काफ्ले महिला आयोगको बोर्ड सदस्यमा नियुक्त भएको अवसरमा नेपाल अमेरिका पत्रकार संघ (नेजा) का अध्यक्ष सुरज भण्डारी तथा नेप्लिज डायस्पोरा का सम्पादक सतीश चापागाईंले बधाई तथा सफल कार्यकालका लागि शुभकामना व्यक्त गरेका छन्।