नेपाली खबरीलाल
ड्यालस, टेक्सस
नयाँ वर्षको अवसर पारेर पशुपतिनाथ तथा बौद्ध बिहार मन्दिर, युलेशको प्रांगणमा आइतबार आयोजना गरिएको रक्तदान कार्यक्रममा ३० पिन्ट रगत संकलन गरिएको छ।
ड्यालसमा सक्रिय रहेका डालस बडिमालिका लायन्स क्लब, डालस हिमालयन महिला लायन्स क्लब, डालस एभरेष्ट महिला लायन्स क्लब तथा डालस हिमालयन स्पोर्ट्स लायन्स क्लबको संयुक्त आयोजनामा उक्त रक्तदान कार्यक्रम सम्पन्न भएको हो। कार्यक्रममा ३० जना रक्तदाताले उत्साहपूर्वक रक्तदान गरेका थिए।
रक्तदान कार्यक्रम सफल बनाउन ब्लड डोनर्स एसोसिएसन अफ अमेरिका (बिडिए) ले सहकार्य तथा सहजीकरण गरेको थियो भने कार्टर ब्लड केयरले प्राविधिक सहयोग प्रदान गरेको थियो।
रक्तदान गरी जीवन बचाउने महान कार्यमा योगदान पुर्याउनुहुने रक्तदाताहरू, सहयोग गर्ने बिभिन्न संस्थाहरु, स्वयंसेवकहरु सबैलाई डालस हिमालयन स्पोर्ट्स लायन्स क्लबका अध्यक्ष राजेश अधिकारीले धन्यवाद दिनु भयो ।
स्थानीय स्तरमा रगतको अभाव पूर्ति गरी बिरामीको ज्यान जोगाउने उद्देश्यले नेपाली समुदायले स्थापना गरेका विभिन्न लायन्स क्लबहरूले समय–समयमा यस्ता मानवीय तथा सामाजिक रक्तदान कार्यक्रमहरू आयोजना गर्दै आएका छन्।
