नेपाली खबरीलाल
ड्यालस, टेक्सस —
नेपाली समाज टेक्सस (एनएसटी) को नयाँ नेतृत्व चयनका लागि शनिबार सम्पन्न निर्वाचनबाट बिजय भुसाल अध्यक्ष पदमा निर्वाचित भएका छन्। निर्वाचन समितिले सार्वजनिक गरेको अन्तिम तथा आधिकारिक नतिजाअनुसार अधिकांश पदाधिकारी तथा सदस्यहरू भुसाल नेतृत्वको प्यानलबाट निर्वाचित भएका हुन्।
निर्वाचन परिणामअनुसार अध्यक्ष पदमा भुसालले २ हजार ३ सय १८ मत प्राप्त गरे। उनका निकटतम प्रतिस्पर्धी जनक भण्डारीले १ हजार ३ सय ९१ मत प्राप्त गरेका थिए। वरिष्ठ उपाध्यक्ष पदमा जीवलाल भुसाल १ हजार ७ सय ७८ मतसहित विजयी भए भने महिला उपाध्यक्ष पदमा राधिका खरालले २ हजार २ सय ९२ मत प्राप्त गर्दै जित हात पारिन्।
उपाध्यक्ष पदमा दिलिप राई १ हजार ७ सय ५७ मतसहित निर्वाचित भए। महासचिव पदमा प्रभिश श्रेष्ठले १ हजार ९ सय ५१ मत प्राप्त गरी विजयी भएका छन्। सचिव पदमा नारायणबहादुर केसी १ हजार ८ सय ८४ मतसहित निर्वाचित भए।
कोषाध्यक्ष पदमा प्रेम थापा (आदित्य) १ हजार ७ सय ९१ मतसहित विजयी हुँदा संयुक्त कोषाध्यक्ष पदमा कान्ती नेपालले २ हजार २ सय १७ मत प्राप्त गरी जीत दर्ता गरिन्। खेलकुद संयोजक पदमा उजित अधिकारी १ हजार ६ सय ९५ मतसहित निर्वाचित भए भने महिला संयोजक पदमा सोनी थापा (सोनीशा) १ हजार ८ सय ८५ मतसहित विजयी भइन्।
युवा तथा विद्यार्थी संयोजक पदमा आदर्श भण्डारीले २ हजार २ मत प्राप्त गर्दै जीत हात पारे। सदस्यहरूतर्फ अर्जुन बाम, बाबुराम अर्याल, हेम भट्ट, प्रदीप पौडेल र रीना क्षेत्री निर्वाचित भएका छन्।
विदेशमा रहेका नेपालीहरूको संस्थामध्ये सबैभन्दा व्यवस्थित र सशक्त मानिने नेपाली समाज टेक्ससको यस निर्वाचनले नेपालकै संसदीय निर्वाचनको प्रत्यक्ष झल्को दिएको मतदाताहरूले प्रतिक्रिया दिएका छन्। सामाजिक संस्थाको निर्वाचन हुँदाहुँदै पनि उम्मेदवारी दर्ता शुल्क, उम्मेदवारहरूको घोषणापत्र, प्रचार–प्रसारमा देखिएको तडक–भडक र खर्चले सबैको ध्यान तानेको थियो।
बिहान ८ बजेदेखि बेलुकी करिब ८ बजेसम्म लाइन लागेर मतदाताहरूले प्रत्यक्ष मतदान गरेको दृश्य अत्यन्तै रोचक र उत्साहपूर्ण देखिन्थ्यो। निर्वाचन शान्तिपूर्ण रूपमा सम्पन्न भएकोमा निर्वाचन समितिले सबै उम्मेदवार, मतदाता तथा स्वयंसेवकप्रति धन्यवाद व्यक्त गरेको छ।