नेपाली खबरीलाल
ड्यालस, टेक्सस
आगामी डिसेम्बर १३, शनिबारका दिन हुने एनएसटी (नेपाली समाज टेक्सस) को निर्वाचन नजिकिदैँ जाँदा उम्मेदवारहरूले प्रचार–प्रसारलाई तीव्र बनाएका छन्। सामाजिक सञ्जालमा मेसेन्जर समूह सक्रिय हुँदै गएका छन् भने फेसबुकमा चुनावी ब्यानर, प्रचार सामग्री र भेटघाटसम्बन्धी पोस्टहरू बढिरहेका छन्।
यसै क्रममा व्यक्तिगत तथा सामूहिक भेटघाट कार्यक्रम पनि निरन्तर भइरहेका छन्। यस वर्षको निर्वाचनमा मुख्य रूपमा वर्तमान वरिष्ठ उपाध्यक्ष जनक भण्डारी समूह र वर्तमान महासचिव विजयर्भुसाल समूह गरी दुई प्यानल प्रतिस्पर्धामा छन्।
आज जनक भण्डारी समूहले हॉल्टम सिटीस्थित इन्डियन किचेन को सभाकक्षमा ड्यालस–फोर्ट वर्थ क्षेत्रमा कार्यरत पत्रकारहरूसँग अन्तरक्रिया कार्यक्रम गरेको छ।
कार्यक्रममा बोल्दै अध्यक्ष पदका उम्मेदवार जनक भण्डारीले नेपाली समाज टेक्ससमा समुदायको आकर्षण बढाउन आफू प्रतिबद्ध रहेको बताए। आफू निर्वाचित भएमा समुदायका समस्या पहिचान गरी समुदायसँगै मिलेर समाधानमुखी काम गर्ने योजना रहेको उनले बताए।
त्यस्तै महासचिव पदका उम्मेदवार रामकृष्ण यादवले समुदायलाई प्रचारभन्दा बढी आपतकालीन सेवा र सहयोग आवश्यक भएको उल्लेख गरे।
“हामीले काम गर्दा फेसबुकमा प्रचारमै समय खर्चिनु हुँदैन; यदि हामीले राम्रो काम गरियो भने समुदायले नै त्यसको सबभन्दा राम्रो प्रचार गर्छ,” यादवले भने।
यादवले सक्षम र सबल समाज निर्माणमा मिडियाको भूमिका अत्यन्त महत्वपूर्ण रहेको उल्लेख गर्दै,
“मिडिया बलियो भयो भने समुदायलाई आवश्यक र सही सूचना प्रवाह गर्न सकिन्छ, समुदाय सशक्त बन्छ,” भन्दै आफ्नो टीमले मिडियासँग मिलेर काम गर्ने प्रतिबद्धता व्यक्त गरे।
कार्यक्रममा वरिष्ठ उपाध्यक्ष चण्डी भण्डारी, उपाध्यक्ष गुन्जन भण्डारी, महिला उपाध्यक्ष राधिका खराल, सचिव सुशिल बर्तौला, कोषाध्यक्ष भोला मैनालीलगायतका पदाधिकारी , सदस्यहरुले पनि आफ्नो परिचय तथा आगामी योजनाहरू प्रस्तुत गरेका थिए। कार्यक्रमको सहजिकरण तथा सन्चालन नेपाली समाज टेक्ससका पूर्ब महासचिब सन्देश उप्रेतीले गरेका थिए ।