नेपाली खबरीलाल
ड्यालस, टेक्सस
नेपाली समाज टेक्ससको नयाँ नेतृत्व चयनका लागि सर्बाधिक चर्चामा रहेका पूर्व उपाध्यक्ष तथा वर्तमान प्रवक्ता किरण पौड्यालले अध्यक्ष पदको उम्मेदवारी स्वेच्छिक रूपमा फिर्ता लिएको घोषणा गरेका छन्।
पौड्यालले बुधबार एक प्रेस विज्ञप्ति जारी गर्दै समाजमा देखिन थालेको विभाजनको जोखिमका कारण आफू निर्वाचन प्रतिस्पर्धाबाट बाहिरिएको स्पष्ट पारेका छन्। “यो निर्णय पराजय वा असमर्थताको कारणले होइन, समाजको एकता, मर्यादा र दीर्घकालीन हितलाई केन्द्रमा राखेर गरिएको विवेकी कदम हो,” विज्ञप्तिमा उल्लेख छ।
समाजमा आफूले पदभन्दा कामलाई प्राथमिकता गर्दै आएको दाबी गर्दै पौड्यालले आफ्ना विभिन्न कार्यकालीन योगदानहरूको उल्लेख गरेका छन्। निर्विरोध सदस्यका रूपमा सेवा, महासचिव पद पाउने सुनिश्चितता हुँदाहुँदै सहकर्मीलाई अवसर दिने निर्णय, उपाध्यक्षका रूपमा अध्यक्षसरह सक्रिय भूमिका, तथा समाजको २५ वर्षे इतिहासमा पहिलोपटक प्रवक्ताका रूपमा अभिलेखीकरण कार्य सम्पन्न गरी ऐतिहासिक पुस्तक प्रकाशन—यी सबै कार्यहरूले समाजलाई संस्थागत बनाउन महत्वपूर्ण भूमिका खेलेको उनले विज्ञप्तिमार्फत बताएका छन्।
“मैले आगामी कार्यकालका लागि अध्यक्ष पदमा तयारी गरिरहेको भए पनि समाजमा विभाजनको संकेत बढ्दै गएको देखेर स्वेच्छिक रूपमा पछि हट्नु नै उपयुक्त ठानें,” पौड्यालले विज्ञप्तिमा भनेका छन्। आफ्नो निर्णयलाई उनले भगवान श्रीकृष्णले अर्जुनको संकल्प पूरा गराउन युद्धमै रणनीतिक रूपमा पछाडि हटेको प्रसंगसँग तुलना गर्दै “समाज र जीवनमा विवेकी निर्णय नै ठूलो पराक्रम हो,” बताएका छन्।
उनले निर्विरोध नेतृत्व चयन हुने आफ्नो पुरानो एजेन्डा अहिले पनि यथावत रहेको उल्लेख गर्दै आगामी नेतृत्व पनि सहमतिपूर्ण ढंगले चयन होस् भन्ने आशा व्यक्त गरेका छन्।