नेपाली खबरीलाल
ड्यालस, टेक्सस
टेक्ससको ड्यालसमा चिसो मौसम सुरु भइसकेको छ। यिनै चिसो मौसममा ड्यालसका नेपाली दर्शक तथा श्रोतालाई नेपालका चर्चित गायक दुर्गेश थापाले तताउने भएका छन्। यही १५ नोभेम्बर, शनिबार, युलेसस्थित सफायर इभेन्ट हलमा आयोजना हुन लागेको लाइभ कन्सर्टमा थापाले आफ्ना दमदार प्रस्तुतीमार्फत नेपाली दर्शक तथा श्रोतालाई रोमाञ्चित बनाउन लागेका हुन्।
बिजुली इन्टरटेन्मेन्ट, साझा इभेन्ट्स र फेम नेपालको संयुक्त आयोजनामा हुन लागेको सो कार्यक्रममा दुर्गेश थापासँगै चर्चित कलाकारहरू राजेश पायल राई, किरण गजमेर, इन्द्र शाह, छवि राज सुनार र डीजे राईले पनि प्रस्तुति दिने कार्यक्रम रहेको आयोजक आकाश अधिकारीले जानकारी दिए।
लाइभ कन्सर्ट १५ नोभेम्बर, शनिबार दिउँसो ४ बजेदेखि राति १२ बजेसम्म सञ्चालन हुनेछ। कार्यक्रमका लागि प्रवेश टिकट ड्यालसका विभिन्न स्थानबाट बिक्री भइरहेको आयोजकहरूले जनाएका छन्।
कार्यक्रममा दर्शक तथा श्रोतालाई अत्यन्तै मनपर्ने थापाका लोकप्रिय गीतहरू ‘दुश्मन हेरेको हेरै’, ‘रातो रातो खुर्सानी पिरो छ’, ‘बिचबिचमा’ लगायतका दर्जनौँ हिट गीत प्रस्तुत गरिनेछन्।
यसअघि थापाले अमेरिकाका अस्टिन, न्युयोर्क सिटी, ह्यारिसबर्ग, पिट्सबर्ग, भर्जिनियाको मनसास, बाल्टिमोर र स्यान फ्रान्सिस्कोमा पनि सफल प्रस्तुति दिइसकेका छन्।
आफूलाई गायकभन्दा “परफर्मर” भन्न रुचाउने थापा युवामाझ अत्यन्त लोकप्रिय छन्। उनको ऊर्जा, करिश्मा र स्टेज–प्रेजेन्सका कारण दर्शकलाई भरपूर मनोरञ्जन हुने आयोजकले विश्वास व्यक्त गरेका छन्।