नेपाली खबरीलाल
टेक्सस, अमेरिका
यस वर्षको छठ पर्व अमेरिकाका विभिन्न राज्यहरूमा भव्य र उल्लासपूर्ण ढंगले सम्पन्न गरिएको छ। मधेसी समुदायको बाक्लो बसोबास रहेका टेक्सस, न्यूयोर्क, फ्लोरिडा, क्यालिफोर्निया, एटलान्टा लगायतका राज्यहरूमा धार्मिक आस्था र सांस्कृतिक एकताको प्रतीकका रूपमा यो पर्व हर्षोल्लासका साथ मनाइएको मधेसी अगुवाहरूले जनाएका छन्।
अमेरिकामा रहेका सार्वजनिक ताल, पोखरी र नदी किनारहरूमा मधेसी समुदायका श्रद्धालुहरूले विधिपूर्वक छठी माईको पूजा–आराधना गरेका थिए। प्रवासमा आयोजित छठ पर्वका कार्यक्रमहरूमा नेपाल सरकारका दूतावासका प्रतिनिधि, स्थानीय पत्रकार, नेपाली समुदायका विभिन्न संस्थाका पदाधिकारी तथा मधेसी समुदायका भक्तजनहरूको उल्लेखनीय सहभागिता रहेको थियो।
न्यूयोर्कमा ‘माँ संस्था’का संस्थापक डा. विनोद साहको घरको प्राङ्गणमा विशेष पूजा कार्यक्रम सम्पन्न गरिएको थियो। उपस्थित सहभागीहरूले सूर्यदेव र छठी माईको आराधना गर्दै परिवार, समाज र विश्वमा सुख–शान्ति तथा समृद्धिको कामना गरेका थिए भन्ने जानकारी मधेसी एशोसिएसन इन अमेरिका (माँ) का अध्यक्ष मनोज सिंहले दिएका छन्।
त्यस्तै टेक्ससको ड्यालस–फोर्टवर्थ क्षेत्रमा रहेका मधेसी समुदायले सोमबार डेन्टनमा छठ पर्व मनाएका थिए। डीएफडब्ल्यू छठ पूजा तथा साँस्कृतिक केन्द्रले आयोजना गरेको सो कार्यक्रममा मधेसी तथा गैरमधेसी समुदायको समेत उल्लेखनीय सहभागिता रहेको थियो। साथै टेक्ससको अस्टिनमा पनि भव्य रूपमा छठ पर्व मनाइएको छ।
छठ पर्व सूर्य उपासना र छठी भगवतीको आराधनासँग सम्बन्धित चारदिने धार्मिक पर्व हो। यस पर्वमा महिलाहरूले व्रत बसेर पुत्र, पति र परिवारको दीर्घायु तथा कल्याणको कामना गर्दछन्। यो पर्व नहाय–खाय, खरना, संध्याअर्घ्य र बिहानको अर्घ्य गरी चार चरणमा सम्पन्न गरिन्छ।
पञ्चमीका दिन स्नान गरी आत्मशुद्धि गर्ने चलन छ भने खरनाको दिन बेलुकी दूध, चामल र गुड मिसाएर पकाइएको खीर प्रसादका रूपमा ग्रहण गरिन्छ। षष्ठीका दिन नदी, ताल वा पोखरीका घाटमा अस्ताउँदो सूर्यलाई अर्घ्य दिइन्छ र भक्तजनहरूले फलफूल, ठेकुवा, कसार अर्पण गरी सूर्यदेवको आराधना गर्छन्। सप्तमीका दिन बिहान उदाउँदो सूर्यलाई पुनः अर्घ्य अर्पण गरी पूजा विसर्जन गरिन्छ।
अमेरिकाका विभिन्न राज्यमा सम्पन्न छठ पर्वका कार्यक्रमहरूले प्रवासमा रहेका नेपाली र मधेसी समुदायबीच एकता, संस्कृतिको संरक्षण र धार्मिक भावनाको साझापनलाई सुदृढ पारेको देखिएको छ।
