नेपाली खबरीलाल
टेक्सस (अमेरिका)
नेपाली राजदूतावास वासिङटन डीसीद्वारा अमेरिकाको कोलोराडो राज्यमा सन्चालन गरिएको तीन दिने राहदानी सेवा शिविरबाट कुल ५ सय ३१ जना नेपाली लाभान्वित भएका छन् ।
गत अक्टोबर १० देखि १२ तारिखसम्म सञ्चालन गरिएको शिविरमा ५ सय ५ जनाको राहदानी नविकरण र २६ जनाको एनआरएन कार्ड फारम संकलन गरिएको टोली प्रमुख अरूणा घिसिङले जानकारी दिएकी छन् ।
कोलोराडोको नेपाली सांस्कृतिक केन्द्र नेपाली घर मा सञ्चालन गरिएको उक्त शिविरमा एरिजोना, टेक्सास, नेब्रास्का, मिनेसोटा, युटाह, ओहायो, केन्सास, न्यूमेक्सिको, भर्जिनिया र वायोमिङलगायतका विभिन्न राज्यबाट नेपाली सेवाग्राहीहरूले सेवा लिएका दूतावासले जनाएको छ ।
हेल्पिङ ह्यान्ड्स हेल्थ एजुकेसनको संयोजनमा, नेपाली घरको अगुवाइ र एनआरएन कोलोराडो च्याप्टर तथा रकी माउन्टेन फ्रेण्ड्स अफ नेपालको सक्रिय सहभागितामा शिविरको व्यवस्थापन गरिएको थियो ।
नेपाली राजदूतावास वासिङटन डीसीबाट आएका कूटनीतिक स्टाफ अरूणा घिसिङ, सोना खडारी, यज्ञप्रसाद रेग्मी र टेक्सास काउन्सिल अफिसकी हरिमया अधिकारीसहितको चार सदस्यीय टोलीले सेवा प्रदान गरेको थियो ।
शिविरमा ९३ वर्षीया जेष्ठ नागरिक रत्नमया खड्का र १० वर्षमुनिका दुई दर्जन बालबालिकासहित सयौं सेवाग्राहीले सेवा लिएका थिए। नेपाली घरका वरिष्ठ उपाध्यक्ष गंगा चौलागाईंका अनुसार करिब ४ सय सेवाग्राहीले अग्रिम अनलाइन फारम भरेर समय निर्धारण गरेका थिए भने बाँकीले स्थलमै प्रक्रिया पूरा गरेका थिए ।
कार्यक्रमको समापन समारोहमा नेपाली घरका अध्यक्ष बसन्त लम्साल र हेल्पिङ ह्यान्ड्स हेल्थ एजुकेसनका अध्यक्ष नारायण श्रेष्ठले सहभागी तथा सहयोगी सबैलाई धन्यवाद ज्ञापन गर्दै नेपाली समुदायको एकता, सहकार्य र आस्थाको केन्द्र नेपाली घर मा यस्तो महत्वपूर्ण कार्यक्रम सम्पन्न गर्न पाएकोमा खुसी व्यक्त गरे ।
त्यसैगरी टोली प्रमुख अरूणा घिसिङले राजदूतावास, आयोजक संस्था, स्वयंसेवी र समुदायको सक्रिय सहकार्यका कारण सेवा शिविर सहज र प्रभावकारी रूपमा सम्पन्न भएको बताइन् ।
