नेपाली खबरिलाल
ड्यालस, टेक्सस
गैरआवासीय नेपाली संघ, अमेरिकाले राष्ट्रिय समन्वय परिषद् (एनसीसी) एकताको लागि सम्बद्ध पक्षहरूलाई आह्वान गरेको छ।
राष्ट्रिय समन्वय परिषद् (एनसीसी) का अध्यक्ष विकास उप्रेतीको अध्यक्षतामा हालै सम्पन्न बैठकले विगतका विभिन्न कारणले अलग-अलग समूहमा रहेका नेतृत्वकर्ताहरू, अभियन्ता तथा सदस्यहरूलाई मूलधारमा फर्की एनसीसी अमेरिकाको एकतालाई मजबुत बनाउन आग्रह गरेको हो।
एनआरएनए अमेरिकाका प्रवक्ता द्रोण गौतमका अनुसार, अगस्ट ११ र अगस्ट १९, २०२५ मा सम्पन्न कार्यसमिति बैठक पूर्ण रूपमा एनसीसीको एकता र संस्थागत विकासका विषयमा केन्द्रित रहेको थियो। उनका अनुसार, बैठकले संस्थागत एकता, समावेशी सहभागिता, नयाँ नेतृत्व, र आगामी कार्ययोजना सम्बन्धी आठ बुँदे महत्वपूर्ण निर्णय गरेको छ।
बैठकले जुलाई २७ र २८ मा सम्पन्न निर्वाचनलाई सफल बनाउन सहयोग गर्ने निर्वाचन समिति, पर्यवेक्षक तथा सम्पूर्ण सहयोगीहरूलाई धन्यवाद ज्ञापन गरेको छ। साथै, सेप्टेम्बर १३, शनिबार, ड्यालस, टेक्ससमा बृहत् राष्ट्रिय भेला तथा कार्ययोजना सम्मेलन आयोजना गर्ने र सेप्टेम्बर १४ मा भौतिक कार्यसमिति बैठक गर्ने निर्णय गरिएको छ।
प्रवक्ता गौतमका अनुसार, बैठकले बंसजको नागरिकता तथा एनआरएन समुदायका विभिन्न समस्यामा अन्तर्राष्ट्रिय समन्वय परिषद् (ICC), नेपाल सरकार तथा राजनीतिक दलहरूसँग नीतिगत समन्वय र राजनीतिक लबिङ गर्नका लागि विज्ञ समिति गठन गर्ने निर्णय गरेको छ। साथै, बंसजको नागरिकता सम्बन्धी अधिकार सुरक्षित गर्न नेपाल सरकारलाई सकारात्मक दबाब सिर्जना गर्ने उद्देश्यले अनलाइन पोर्टल निर्माण गरी विश्वव्यापी रूपमा इलेक्ट्रोनिक हस्ताक्षर संकलन गर्ने निर्णय गरिएको छ।
बैठकले अमेरिकामा बसोबासका लागि आउने नयाँ आगन्तुक नेपाली दाजुभाइ तथा दिदीबहिनीहरूको सहजीकरणका लागि, विमानस्थलमा होडिङ बोर्ड राख्ने, जानकारीमूलक सामग्री वितरण गर्ने तथा सम्पर्क विवरण उपलब्ध गराउने योजना सार्वजनिक गरेको छ।
पदाधिकारी नियुक्तिअन्तर्गत द्रोण गौतमलाई संघको प्रवक्ता र विजय थापालाई आईटी कोअर्डिनेटरको जिम्मेवारी दिइएको छ।
त्यसैगरी, अन्तर्राष्ट्रिय समन्वय परिषद् (ICC) सम्मेलनमा सहभागी हुने प्रतिनिधि छनोटका लागि सात सदस्यीय समिति गठन गरिएको छ। समितिको संयोजकमा उपाध्यक्ष दीपक सापकोटा रहेका छन् भने वरिष्ठ उपाध्यक्ष प्रेम तामाङसहित सात जना सदस्यहरूलाई समावेश गरिएको छ। समितिले अगस्ट ३१ भित्र प्रतिनिधिहरूको नाम अध्यक्ष तथा महासचिवलाई बुझाउने निर्णय गरेको गैरआवासीय नेपाली संघ, अमेरिकाले राष्ट्रिय समन्वय परिषद् (एनसीसी) जनाएको छ ।