✍ नेपाली खबरीलाल
📍 ड्यालस, टेक्सस
नेपाल–अमेरिका पत्रकार संघ (नेजा) ले ‘ब्रेन ट्युमर’बाट पीडित भई गम्भीर अवस्थामा रहेका संस्थाका आजीवन सदस्य तथा क्यालिफोर्नियाका पत्रकार जिवन्त वाग्लेको उपचार सहयोगका लागि ‘गो फण्ड मी’ अभियान सञ्चालन गरेको छ।
वाग्लेको गत जुलाई ७ मा क्यालिफोर्नियाको सान फ्रान्सिस्कोस्थित वालनट क्रिकको जोन म्युएर अस्पतालमा शल्यक्रिया गरिएको थियो। तर हालसम्म उनी पूर्ण रूपमा होसमा आउन सकेका छैनन्। अस्पतालले लामो समय उपचार आवश्यक पर्ने जनाएपछि नेजाले सहयोग अभियान सुरु गरेको हो।
नेजाका महासचिव ईश्वरी न्यौपानेका अनुसार उपचार खर्च संकलनका लागि ‘गो फण्ड मी’ खाता सञ्चालनमा ल्याइएको हो। नेजाको तर्फबाट प्रारम्भिक रूपमा १ हजार अमेरिकी डलर सहयोग गरिएको र सो खातामार्फत थप सहयोग गरिदिन नेजाले अमेरिकामा रहेका नेपाली समुदायलाई आग्रह गरेको छ।
वर्तमान अवस्थामा वाग्लेको स्वास्थ्यमा कुनै सुधारको संकेत देखिएको छैन। स्वर गुमिसकेको छ भने मुखबाट खाना खान नसकेपछि पेटमा पाइपको सहायताले खाना खुवाइँदै आएको छ। उनलाई कति समयसम्म अस्पतालमै राख्नुपर्ने हो भन्ने अझै यकिन भइसकेको छैन। उहाँ पूर्ण रूपमा निको हुनुहुने नहुने भन्ने विषयमा हाल चिकित्सकले पनि स्पष्ट गर्न नसक्ने अवस्था रहेको जनाइएको छ।
वाग्लेसँग उनकी श्रीमती र १० वर्षीय छोरा छन्। विगत एक वर्षदेखि अस्वस्थ रहँदै आएका वाग्ले आर्थिक रूपमा अशक्त बन्दै गएका थिए। श्रीमतीले रातको समयमा काम गरेर परिवारको खर्च धानिरहेकी थिइन्। तर हाल श्रीमानको अवस्था गम्भीर बन्दै गएपछि उनले जागिर छाडेर श्रीमान र छोराको हेरचाह गरिरहेकी छन्।