नेपाली खबरीलाल
ड्यालस टेक्सस
अमेरिकाको चौथो अधिवेशन शनिबार देखि टेक्सासको ड्यालसमा शुरु भएको छ । उक्त अधिबेशनको उद्घाटन गर्दै प्रवासी नेपाली मञ्च अन्तराष्ट्रिय कमिटीका अध्यक्ष सन्जय थापाले प्रवासी नेपालीहरु संगठित प्रयासबाट प्रवासी नेपालीको हक अधिकार स्थापित गर्न सकिने बताउनु भयो ।
बिश्वभर छरिएर रहेका प्रवासी नेपालीहरुलाई संगठित गर्दै प्रवासमा सहयोग र नेपालमा अधिकारको लागि ओएनएफले पैरवी गर्दै आएको बताउँदै अध्यक्ष थापाले संगठित र सहकार्यको माध्यमबाट प्रवासी नेपालीको पक्षमा सकारात्मक पहल भएको दावी गर्नु भयो ।
प्रवासमा प्रवासी नेपाली मन्चले अभिभावकको भूमिका निर्बाह गरेको बताउँदै क्यालिफोर्निया र टेक्सस लगायत बिदेशका बिभिन्न स्थानमा नेपाल सरकारको कन्सुलेट अफिस स्थापनामा संस्थाले अग्रपंक्तिमा रहेर पहल गरेको अध्यक्ष थापाको भनाई थियो ।
यसै गरि प्रवासी नेपाली मन्च अन्तराष्ट्रिय कमिटी सचिवालय सदस्य प्रभु थापाले आम प्रवासी नेपालीहरुको आशा र भरोसा रहेको प्रवासी नेपाली मन्च र यसका सदस्यहरु सामाजिक क्षेत्रमा अग्रपंक्तिमा देखिनु पर्ने कुरामा जोड दिनु भयो । हामी संस्थामा अनुशासन र पद्धती स्थापित गरिरहेका छौं । हामी सबै मिलेर संस्थामा सबैखाले अराजकता अन्त गर्नु पर्ने बिचार व्यक्त गर्नु भयो ।
प्रवासी नेपाली मन्च अमेरिकाका अध्यक्ष कृष्ण लामिछानेले अमेरिकी कानून अन्तरगत दर्ता भएको संस्था भएकाले यसका गतिबिधिहरु पनि अमेरिका केन्द्रित हुनु पर्ने बिचार व्यक्त गर्नु भयो । बिगतका बर्षमा प्रवासी नेपाली मन्च अमेरिकाका कार्यक्रमहरुमा नेपालबाट अतिथी बोलाउने परिपाटीलाई यस पटक देखि अन्त गरिएको बताउनु भयो ।
संस्थाका अध्यक्ष कृष्ण लामिछानेको अध्यक्षता र सचिब छबि पाण्डेको संचालनमा सम्पन्न उद्घाटन कार्यक्रममा प्रवासी नेपाली मञ्च अन्तराष्ट्रिय कमिटीका केन्द्रिय सदस्यहरु कुन्ती थापा, राजेन्द्र सिवाकोटी, प्रवासी नेपाली मन्च अमेरिका महादेश संयोजक ईश्वरी भट्ट, प्रवासी नेपाली मन्च अमेरिकाका संस्थापक जनक राना लगायत बिभिन्न सामाजिक संस्थाका प्रतिनिधिहरुले अधिबेशन सफलताको शुभकामना ब्यक्त गर्नु भएको थियो । अधिबेशनको उद्घाटन कार्यक्रममा संस्थालाई सहयोग गर्ने बिभिन्न ब्यक्ति तथा संस्थालाई कदर पत्रद्धारा सम्मान गरिएको थियो ।
कार्यक्रममा अधिबेशन मूल व्यवस्थापन समितिका संयोजक गोकर्ण दाहालले स्वागत गर्नु भएको अधिबेशनको उद्घाटन कार्यक्रममा बिभिन्न साँस्कृतिक कार्यक्रम पनि प्रस्तुत गरिएको थियो । अमेरिकाका बिभिन्न राज्य कमिटीबाट २ सय ३५ जना प्रतिनिधिहरु र ११ जना पर्यबेक्षकहरु रहेको अधिबेशनले नयाँ नेतृत्व चयन गर्ने ओएनएफ अमेरिकाले जनाएको छ ।
