टेक्ससको राज्य संसदद्वारा १५ मे लाई “बुद्ध डे” घोषणा

नेपाली खबरिलाल
अस्टिन टेक्सस
अमेरिकाको टेक्सस राज्य संसदको बिहिबार सम्पन्न बैठकले गौतम बुद्धको जन्म भूमि नेपाल भएको भन्दै हरेक बर्षको १५ मे लाई “बुद्ध डे” का रुपमा मनाउन एक संकल्प प्रस्ताब पारित गरेको छ । बिहिबार सम्पन्न राज्य सभाको बैठकमा सभामुख (स्पिकर) डस्टिन बुरोले पेश गर्नु भएको १५ मे लाई बुद्ध डे का रुपमा मनाउने सम्बन्धि प्रस्ताब सर्बसम्मत पारित भएको हो ।
टेक्ससका बिभिन्न जिल्लाबाट प्रतिनिधित्व गर्ने हाउस अफ रिप्रजेन्टेटिभ (राज्य सांसद)हरु डा. सुलेमान ललानी, टेरी मेजा, सलमान भोजानी लगायतले बुद्ध डे सम्बन्धि संकल्प प्रस्ताब तयार गरि संसदमा दर्ता गराएका थिए । उक्त अबसरमा नेपाली साँस्कृतिक तथा अध्यात्मिक केन्द्र टेक्सस, नेपाली समाज टेक्सस, ग्रेटर अस्टिन नेपाली समाज, बुद्धिस्ट एशोसियसन अफ टेक्सस, तामाङ सोसाईटी अफ टेक्सस लगायत दर्जन बढी सँस्थाहरु, नेपाल, भियतनाम, कोलम्बिया, मेनमार लगायत बिभिन्न देशका ६० भन्दा बढी बौद्ध भिक्षुहरुको उपस्थिती रहेको थियो ।
टेक्सस राज्यको संसद नेपाल मैत्री बन्दै गएको भन्दै यहाँका नेपाली समुदायले खुशी व्यक्त गरेका छन । टेक्ससको राज्य संसदमा हालसम्म नेपालीमूलका साँसदहरुको प्रतिनिधित्व छैन । तर नेपाल सम्बन्धि प्रस्ताबमा हाउस अफ रिप्रजेन्टेटिभ (राज्य सांसद)हरुले उच्च महत्व दिदै आएको नेपाली समाज टेक्ससका अध्यक्ष राजेन्द्र वाग्लेले बताउनु भयो ।
टेक्सास नेपाली समुदायको बाक्लो बसोवास भएको राज्य हो । टेक्ससमा नेपाल र नेपालीको पहिचान स्थापित गराउनका लागि यहाँका नेपाली समुदायहरुले लामो समय देखि पैरवी गर्दै आएका थिए । हाल सम्म टेक्ससको राज्य संसदबाट नेपाल डे, लुम्बिनी डे, सम्बन्धि संकल्प प्रस्ताब पारित भई सकेका छन । बुद्ध डे मनाउने सम्बन्धि संकल्प प्रस्ताब तेश्रो हो ।
बुद्ध डे मनाउने सम्बन्धि प्रस्ताब नेपाल र नेपालीहरुको पहिचानको पक्षमा भएको थप सफलता भएको ग्रेटर अस्टिन नेपाल समाजका अध्यक्ष बिदुर खतिवाडाले बताए । अध्यक्ष खतिवडाका अनुसार टेक्सासको राज्यसभाले गौतम बुद्धको जन्मभूमि नेपालको लुम्बिनी भएको स्वीकार गरि संकल्प प्रस्ताब पारित गरेकाले हरेक बर्षको १५ मे लाई बुद्ध डे का रुपमा बिभिन्न कार्यक्रमको आयोजना गरि मनाईने छ ।