नेपाली खबरीलाल
ड्यालस टेक्सास
नेपाली पात्रो अनुसार यस बर्षको होली पर्ब मार्च महिनाको १३ (पहाडी जिल्ला) र १४ (तराई जिल्ला) तारेखमा परेको छ । तर अमेरिकाको टेक्सासमा रहेका नेपाली समुदायमा भने एकसाता अघि देखि नै होली पर्बको रमझम शुरु भईसकेको छ । टेक्सासमा रहेका नेपाली समुदायका संस्थाहरु आफुले आयोजना गर्ने होली बिशेष कार्यक्रमको ब्यानर सामाजिक सन्जाल मार्फत सार्बजनिक गरिरहेका छन ।
होली पर्ब मनाउन अमेरिकाको परिबेश नेपालको जस्तो अनुकुल छैन । प्रवासमा छरिएर रहेका नेपालीहरुलाई एकताबद्ध गरि सबैलाई पायक पर्ने दिन र उपलब्ध सार्बजनिक स्थानमा होली मनाउनु पर्ने बाध्यता रहेको छ । टेक्सास स्थित नेपाली समुदायका जातीय तथा क्षेत्रीय संस्थाहरुले सबैलाई पायक पर्ने दिन र स्थानमा संयुक्त र छुट्टा छुट्टै होली मनाउने भएका छन ।
टेक्सासको ड्यालस स्थित ग्रेपभाईन पार्कमा ९ मार्च आईतबारका दिन मेघा होली आयोजना हुँदैछ । नेपाली समाज टेक्सस, नेपाली साँस्कृतिक तथा अध्यात्मिक केन्द्र र ईन्द्रेणी साँस्कृतिक संघले संयुक्त रुपमा मेघा होली आयोजना गर्ने भएका हुन । उक्त मेघा होलीमा गैरआवासीय नेपाली संघ टेक्सस च्याप्टर, लुम्बिनी सेवा समाज अमेरिका, सुदूरपश्चिम नेपाली समाज टेक्सास, मगर संघ टेक्सस, तामाङ समाज टेक्सस, झापाली समाज अमेरिका, किरात राई समाज अमेरिका, टेक्सोमा नेपाली समाज, टेक्सस, नेपाली साँगीतिक साँस्कृतिक समुह, टेक्सस र युकेरोअ टेक्सस लगायतका संस्थाहरुले मेघा होली पर्बमा सहभागिता जनाउने नेपाली समाज टेक्सासका अध्यक्ष राजेन्द्र वाग्लेले जानकारी दिनु भयो ।
अध्यक्ष वाग्लेका अनुसार सबै नेपाली सँस्थाका लक्षित समुदाय एउटै भएको र अमेरिकामा अधिकाँश नेपालीहरु काममा व्यस्त रहनु पर्ने भएकाले सम्भव भए सम्म सबैको सहभागिता हुने गरि मेघा होली कार्यक्रम आयोजना गरिएको हो । आगामी दिनमा नेपाली चाडपर्बहरुलाई छुट्टा छुट्टै आयोजना नगरि संयुक्त रुपमा मनाउन प्रयास गरिने नेपाली समाज टेक्सासले जनाएको छ ।
ड्यालसको ग्रेपभाईन पार्कमा आयोजना हुने मेघा होली कार्यक्रममा होली बिशेष साँस्कृतिक कार्यक्रम, एक आपसमा रंग लगायर होली पर्बको शुभकामना आदान प्रदान कार्यक्रम लगायका कार्यक्रम आयोजना हुनेछन ।
यस्तै टेक्सासमा रहेका मधेशी समुदायले छुट्टा छुट्टै होली पर्ब आयोजना गर्दैछन । अमेरिका मधेशी समाज टेक्सासले मार्च ९ आईतबारका दिन ग्रेपभाईन लेकमा होली बिशेष कार्यक्रम आयोजना गर्ने भएको छ भने मधेशी एशोसियशन ईन अमेरिका(माँ) ले १५ मार्च शनिबारका दिन ग्रेपभाईन लेकमा होली कार्यक्रम आयोजना गर्दैछ ।
यसैगरि ग्रेटर अस्टिन नेपाली समाज अस्टिनले पनि यस बर्षको होली पर्ब १५ मार्च शनिबारका दिन मनाउन लागेको सो सँस्थाले जनाएको छ ।
