नेपाली खबरिलाल
ड्यालस, टेक्सस
गैरआवासीय नेपाली संघ अमेरिका टेक्सस च्याप्टरले स्थानीय सफल नेपाली महिला उद्यमीहरुसँग अन्तरक्रिया कार्यक्रम गर्ने भएको छ । यस बर्षको अन्तराष्ट्रिय श्रमिक महिला दिवसको सन्दर्भ पारेर टेक्सस च्याप्टरले शनिबार टेक्ससको अर्भिङमा एक कार्यक्रमको आयोजना गरेर बिभिन्न पेशा व्यवसायमा सफल महिला व्यवसायीहरुसंग छलफल गर्न लागेको हो ।
यस बर्षको अन्तराष्ट्रिय श्रमिक महिला दिवसको नारा “ सबै महिला र केटीहरुका लागि ः अधिकार, समानता र सशक्तिकरण” रहेको छ । हामीले पनि नेपाली समुदायका महिलाहरुलाई अधिकार, समानता र सशक्तिकरणका बिषयमा जानकारी गराई सशक्त गराउने उद्देश्यले स्थानीय सफल नेपाली महिला उद्यमीहरुसंग अन्तरक्रिया कार्यक्रम आयोजना गर्न लागिएको एनआरएनए टेक्सस च्याप्टरका महिला संयोजक अनु तामाङले बताउनु भयो ।
सफल महिला व्यवसायीहरुसंगको अन्तरक्रिया कार्यक्रम २२ फ्रेबुअरी शनिबारका दिन अर्भिङ स्थित भेटघाट रेष्टुरेन्टमा आयोजना हुने छ । कार्यक्रममा नेपाली समुदायका सफल महिलाहरु मध्य महिला उद्यमी यमुना भट्टराई, सर्टिफाईड पारालिगल सिर्जना शर्मा (पोखरेल), सर्टिफाईड फेमली नर्श प्राक्टिशनर अनु श्रेष्ठ र रियल स्टेट एण्ड ईन्स्युरेन्स एजेन्ट अनु तामाङ प्रमुख बक्ताका रुपमा रहने छन । प्रमुख बक्ताहरुले आफ्ना सफलताका कथाहरु प्रस्तुत गरेपछि सहभागि महिलाहरुका बिचमा अन्तरक्रिया गरिने एनआरएनए टेक्सस च्याप्टरले जनाएको छ ।
गैरआवासीय नेपाली संघ टेक्सस च्याप्टरले हरेक बर्ष अन्तराष्ट्रिय श्रमिक महिला दिवसको सन्दर्भ पारेर जानकारीमूलक र सचेतनामूलक कार्यक्रम आयोजना गर्दै आएको छ । अमेरिकामा प्राय मानिसहरु काममा व्यस्त रहने भएकाले बिभिन्न दिवस लगायत सार्बजनिक कार्यक्रमहरु सबैलाई पायक पर्ने स्थान र मितिमा बिदाको दिन पारेर आयोजना गर्ने गरिन्छ ।