नेपाली खबरिलाल
ड्यालस, टेक्सास
नेपाली काँग्रेसका केन्द्रीय सदस्य तथा नेपाली जनसम्पर्क समिति समन्वय बिभाग प्रमुख किरणराज शर्मा पौडेलले नेपाली जनसम्पर्क समितिहरुको अधिबेशन ६ महिना भित्र सम्पन्न गरिसक्ने बताउनु भएको छ ।
४९ औं राष्ट्रिय एकता तथा मेलमिलाप दिवसको अवसरमा शनिबार नेपाली जनसम्पर्क समिति ड्यालस फोर्टवर्थ शाखाले आयोजना गरेको अन्तरक्रिया कार्यक्रममा बोल्दै नेता पौडेलले अधिबेशन सम्पन्न हुन बाँकी सबै देशका नेपाली जनसम्पर्क समितिहरुको अधिबेशन ३ महिना देखि ६ महिना भित्र सम्पन्न गर्न नेपाली काँग्रेसको नेपाली जनसम्पर्क समिति समन्वय बिभागले तयारी थालेको जानकारी दिनु भयो ।
बिदेशमा रहेका नेपाली जनसम्पर्क समितिहरु नेपाली काँग्रेसका मेरुदण्ड भएको भएको बिचार व्यक्त गर्दै काँग्रेस नेता पौडेलले नेपाली जनसम्पर्क समितिमा आबद्ध नेता कार्यकर्ताहरुलाई सकृय र चलायमान बनाउनका लागि अधिबेशन सम्पन्न गरि नयाँ नेतृत्व चयन हुनु पर्ने बिचार व्यक्त गर्नु भयो । नेता पौडेलले बिदेशी नागरिकता प्राप्त व्यक्ति पनि सम्बन्धित देशको कानून अनुसार नेपाली जनसम्पर्क समितिमा आबद्ध र सकृय हुन पाउने गरि नेपाली काँग्रेसले बिधानमा व्यवस्था गरेकाले सबै लोकतन्त्रबादीहरु नेपाली जनसम्पर्क समितिमा आबद्ध हुन आह्वान समेत गर्नु भयो ।
नेपाली जनसम्पर्क समिति ड्यालस फोर्टवर्थ शाखाका अध्यक्ष ज्ञानेन्द्रराज कार्कीको अध्यक्षता तथा बादल भुजेलको सन्चालनमा सम्पन्न अन्तरकृया कार्यक्रमका प्रमुख अतिथी समेत रहेका नेता पौडेलले जननेता बिपी कोईरालाले नेपालको राष्ट्रियता र प्रजातन्त्रको पुनस्र्थापनाका लागि बि.सं. २०३३ सालमा अबलम्बन गरेको राष्ट्रिय एकता तथा मेलमिलापको नीति अहिले पनि सान्दर्भिक रहेको चर्चा गर्नु भयो । नेपालमा दिगो शान्ति, सुशासन तथा समुन्नत नेपाल निर्माणको लागि राजनैतिक दल भित्रको आन्तरिक लोकतन्त्र र राजनैतिक दलका बिचको आपसी एकता र मेलमिलाप बलियो हुनु पर्ने नेता पौडेलको जोड थियो ।
अर्का अतिथी बक्ता नेपाल टेलिभिजनका पूर्ब अध्यक्ष समिरजँग शाहले बिपी कोईरालाको राष्ट्रिय एकता तथा मेलमिलापको नीतिको महत्वको वारेमा चर्चा गर्नु भएको थियो । राष्ट्रिय एकता तथा मेलमिलापको नीति अहिले पनि उत्तिक्कै सान्दर्भिक रहेको बताउँदै नेपाली काँग्रेसले पार्टी भित्रबाट एकता र मेलमिलापको राजनीति शुरु गर्नु पर्ने शाहको भनाई थियो ।
कार्यक्रममा नेपाली जनसम्पर्क समिति अमेरिकाका पूर्ब अध्यक्ष बिष्णु सुबेदी, गैरआवासीय नेपाली सँघका महासचिब गौरीराज जोशी, गैरआवासीय नेपाली सँघ अमेरिकाका बरिष्ठ उपाध्यक्ष बिकास उप्रेती, प्रवासी नेपाली मन्च अमेरिकाका उपाध्यक्ष गोकर्ण दाहाल, नेपाली समाज टेक्सासका अध्यक्ष राजेन्द्र वाग्ले तथा पत्रकारहरुको तर्फबाट नेजाका पूर्ब अध्यक्ष बिकासराज न्यौपानेले अमेरिकामा गैरआवासीय नेपालीको बर्तमान अवस्था, गैरआवासीय नेपालीकहरुका सवालहरु र नेपाल सरकारले सम्बोधन गर्नु पर्ने विषयका बारेमा चर्चा गर्नु भएको थियो । कार्यक्रममा नेपाली जनसम्पर्क समिति अमेरिकाका नेता भगवान मैनालीले स्वागत गर्नु भएको थियो ।
