नेपाली खबरिलाल
ड्यालस टेक्सास
शिक्षाबिद् डा. भोजबहादुर बलायरको शब्द रचनामा रहेको “एक पटकको नेपाली” गीतको म्युजिक भिडियो युटुव मार्फत सार्बजनिक भएको छ । प्रवासमा जन्मेका र हुर्केका दोश्रो पुस्ताका नेपालीहरुलाई मातृभूमिसँग जोड्न सहयोग गर्ने उद्देश्यले म्युजिक भिडियो उत्पादन गरिएको हो ।
उक्त गीतमा एक पटकको नेपाली सधैको नेपाली भन्ने सन्देश दिन खोजिएको छ । प्रवासमा जन्मेका र हुर्केका दोश्रो पुस्ताका नेपालीहरुलाई नेपाल चिनाउन आबश्यक रहेकाले यो गीत उपयोगी हुने बिश्वास गरिएको डा. बलायरले बताउनु भयो ।
एक पटकको नेपाली सधैको नेपाली भन्ने बिषय बिगत लामो समय देखि उठेको हो । यो विषयलाई पहिलो पुस्तामा मात्र होईन, प्रवासमा जन्मेका र हुर्केका दोश्रो पुस्ता सम्म पनि बहस र छलफलको बिषय बनाउन जरुरी भई सकेको डा. बलायरको धारणा रहेको छ ।
डा. बलायरका अनुसार प्रस्तुत गीत ग्लोबल नेपाली पाठशाला लगायत प्रवासमा सन्चालित नेपाली पाठशालाहरुमा शिक्षणका क्रममा उपयोगी हुने बिश्वास गरिएको छ ।
“एक पटकको नेपाली” गीतको म्युजिक भिडियो नेपाल र अमेरिकामा छायाँकन गरिएको हो । गीतमा संगीत तथा स्वर व्यासाचार्य भुवन गुरुले भर्नु भएको छ । म्युजिक भिडियोमा व्यासाचार्य भुवन गुरु, बाल कलाकार अभिषेक घिमिरे र आयुस घिमिरे लगायतले अभिनय गरेका छन ।
म्युजिक भिडियोको छायांकन काठमाण्डौंमा युंका स्टुडियो प्रा.लि र अमेरिकामा किरण पौड्यालले गर्नु भएको हो । म्युजिक भिडियो उत्पादनमा नेपाली समाज टेक्सास, नेपाली साँस्कृतिक तथा अध्यात्मिक केन्द्र र नेपाली पन्चेबाजा समूह टेक्सास तथा भक्तबहादुर भण्डारीको सहयोग रहेको छ ।
