नेपाली खबरीलाल
ड्यालस, टेक्सस
नेपालमा आएको विनाशकारी बाढीका कारण ज्यान गुमाएका व्यक्तिहरूप्रति श्रद्धाञ्जली तथा शोकसन्तप्त परिवारजनप्रति समवेदना व्यक्त गर्न अमेरिकाको ड्यालसस्थित नेपाली महावाणिज्यदूतावासमा शोकपुस्तिका राखिएको छ।
महावाणिज्यदूतावासले एक सूचना जारी गर्दै उक्त दुःखद् घटनामा परी निधन भएका व्यक्तिहरूप्रति श्रद्धाञ्जली अर्पण गर्न तथा शोकसन्तप्त परिवारजनप्रति समवेदना प्रकट गर्न दूतावास परिसरमा शोकपुस्तिका राखिएको जनाएको छ।
महावाणिज्यदूतावासका अनुसार २०८३ भदौ १५ गते सोमबारदेखि भदौ १८ गते बिहीबारसम्म शोकपुस्तिकामा श्रद्धाञ्जली तथा समवेदना व्यक्त गर्न समय तालिका तोकिएको थियो। तर, प्रवासमा नेपाली समुदायको व्यस्ततालाई ध्यानमा राख्दै इच्छुक व्यक्तिहरूले अन्य दिनमा पनि शोकपुस्तिकामा हस्ताक्षर गरी श्रद्धाञ्जली तथा समवेदना व्यक्त गर्न सक्ने व्यवस्था मिलाइएको छ।
शोकपुस्तिका राखिने समय बिहान १० बजेदेखि दिउँसो १२ः३० बजेसम्म तथा दिउँसो २ः३० बजेदेखि ४ बजेसम्म तोकिएको छ।
शोकपुस्तिका नेपाली महावाणिज्यदूतावास, १२३० रिभर बेन्ड ड्राइभ, सुइट २२०, ड्यालस, टेक्सस ७५२४७ मा राखिएको छ।
त्यस्तै, महावाणिज्यदूतावासमा उपस्थित हुन नसक्ने इच्छुक महानुभावहरूले condolences@nepalconsulatedallas.org मा समेत श्रद्धाञ्जली तथा समवेदना सन्देश पठाउन सक्ने व्यवस्था गरिएको छ।
महावाणिज्यदूतावासले बाढीका कारण ज्यान गुमाएका सबैप्रति श्रद्धाञ्जली अर्पण गर्दै घाइते तथा प्रभावितहरूको शीघ्र स्वास्थ्यलाभको कामना गरेको छ।
