नेपाली खबरीलाल
ड्यालस, टेक्सस
नेपाली कांग्रेसको प्रवास संगठन नेपाली जनसम्पर्क समिति अमेरिकाको बहुप्रतीक्षित केन्द्रीय अधिवेशन आगामी अगस्ट १४, १५ र १६, २०२६ मा अमेरिकाको डीसी मेट्रो क्षेत्रमा आयोजना हुने भएको छ। विगत १२ वर्षदेखि हुन नसकेको अधिवेशनको मिति र स्थान नेपाली कांग्रेस केन्द्रीय समितिबाट स्वीकृत भएपछि अधिवेशन हुने निश्चित भएको हो।
अधिवेशन डीसी मेट्रो क्षेत्रमा आयोजना गर्ने स्वीकृति प्राप्त भए पनि अन्तिम स्थल मेरिल्याण्ड र वाशिङ्टन डीसीको सीमावर्ती क्षेत्रमा यसै साता टुङ्गो लगाइने तयारी भइरहेको अधिवेशन तयारी समितिका सदस्य–सचिव गौतम दाहालले जानकारी दिए।
नेपाली कांग्रेस केन्द्रीय कार्यालयको निर्देशन तथा विधानअनुसार लामो समयदेखि रोकिएको अधिवेशन सम्पन्न गर्न गठित अधिवेशन तयारी समितिको पूर्ण बैठकले सर्वसम्मत रूपमा मिति र स्थान स्वीकृतिका लागि नेपाली कांग्रेस केन्द्रीय कार्यालयमा सिफारिस पठाएको थियो।
नेपाली जनसम्पर्क समिति अमेरिकाको नयाँ नेतृत्व चयनका लागि भक्त थापाको नेतृत्वमा पाँच सदस्यीय निर्वाचन समिति तथा विनोद भट्टको संयोजकत्वमा विधान समिति गठन गरिएको छ। त्यसैगरी आर्थिक, प्रचार–प्रसार, व्यवस्थापन, स्वयंसेवक, सांस्कृतिकलगायत विभिन्न उपसमितिहरूले तीव्र रूपमा तयारीका कामहरू अगाडि बढाइरहेको तयारी समितिले जनाएको छ।
यसअघि नेपाली जनसम्पर्क समिति अमेरिकाका अध्यक्ष आनन्द विष्टको नेतृत्वमा रहेको कार्यसमितिले गत डिसेम्बरमा २६ वटा च्याप्टरको अधिवेशन सम्पन्न गरी अधिकांश स्थानमा सर्वसम्मत नेतृत्व चयन गरेको थियो। केन्द्रीय अधिवेशनको तयारी भइरहेका बेला नेपाली कांग्रेस केन्द्रीय समितिको निर्देशनअनुसार जनसम्पर्क समितिका गतिविधि स्थगित गरी नेपालमा सम्पन्न आम निर्वाचनमा केन्द्रित गरिएको थियो।
सोही क्रममा अध्यक्ष आनन्द विष्ट नेपाली कांग्रेसका तर्फबाट कैलाली क्षेत्र नं. ४ बाट प्रतिनिधिसभा सदस्यका उम्मेदवार बनेपछि नेपाली कांग्रेस केन्द्रीय समितिले उपाध्यक्ष धनञ्जय नरसिंह के.सी.को संयोजकत्वमा अधिवेशन तयारी समिति गठन गरेको थियो।
सदस्य–सचिव दाहालका अनुसार अधिवेशनमा अमेरिकाभरका २६ वटा च्याप्टरबाट करिब ८०० प्रतिनिधि सहभागी हुने अपेक्षा गरिएको छ।
नयाँ नेतृत्वका लागि दौडधुप सुरु
१२ वर्षपछि हुन लागेको अधिवेशनसँगै नेपाली जनसम्पर्क समिति अमेरिकाभित्र नयाँ नेतृत्व चयनको राजनीतिक सरगर्मी पनि बढेको छ। विभिन्न पदका आकांक्षीहरूले आफ्नो उम्मेदवारीका लागि आन्तरिक भेटघाट, परामर्श तथा समर्थन जुटाउने अभियानलाई तीव्र बनाएका छन्।
यो समाचार तयार पार्दासम्म सभापति पदका लागि अधिवेशन तयारी समितिका सदस्य–सचिव गौतम दाहाल, मुनिन्द्र नैम्वाङ, सीपी पौडेल र ज्ञानेन्द्र कार्की प्रमुख आकांक्षीका रूपमा चर्चामा छन्। त्यसैगरी महासचिव पदका लागि अनुप खनालले आफ्नो उम्मेदवारी सार्वजनिक गरिसकेका छन्।
नेपाली जनसम्पर्क समिति अमेरिकाको अधिवेशन १२ वर्षपछि हुन लागेकाले यस अधिवेशनले विगतका तिक्तता अन्त्य गर्दै संगठनभित्र व्यापक एकता, सहकार्य र लोकतान्त्रिक अभ्यासलाई थप मजबुत बनाउने अपेक्षा गरिएको छ। त्यसका लागि सबै नेता तथा कार्यकर्ताले सकारात्मक भूमिका खेल्नुपर्नेमा कार्यकर्ताहरूले नेतृत्वमाथि दबाब दिन थालेका छन्।